SHILLONG: Meghalaya a·doko NPP-chi dilenggipa Meghalaya Democratic Alliance (MDA) sorkario bakrimaoniko BJP ra·pilna tik ka·manaha aro iani bidingo ta·raken ja·kuko de·china ua ma·mongni BJP dilgiparangko didiataha ine BJP-ni MLA AL Hek parakataha.
MDA-o bakrimaoniko ra·pilna gita State Executive Committee aro BJP-ni national general secretary (Organisation) BL Santosh-ni mikkangon BJP-ni core committee tik ka·manaha ine janapatengon, “Core committee aro State executive committee-on iako tik ka·manahaode MDA-o bakrimaniko watanio maming jajaani dongjaha,” ine Hek parakataha.
“MDA-o bakrimaoniko ta·raken ra·pilna man·na gita anga ma·mongni dilgiparangkoba didiataha,” ineba ua aganaha.
A·bachengonin MDA-o bakrimani ja·manoba da·o term matchotna skangmangmang MDA-oni ong·katna tik ka·engani gimin sing·on, somoi sokahaon ia pilakni gimin che·em che·em talate on·anggen ine BJP MLA parakataha.
“Politics-de ong·kame dongaigipa kam gitasan ong·aia aro an·chingni mingbri kari gitan politics-ba somoini kri dingtang ong·angaia,” ine ua aganaha.
Jasani gisepon, MDA-o bakrimaoniko BJP ra·pilgnok ine adita salrangna skangsan, BJP-ni Meghalaya in-charge Chuba Ao-ba parakatahachim ine nikna man·a.
MDA-ni ong·gijagipa kamrangni gimin Enforcement Directorate (ED) aro Central Bureau of Investigation (CBI)-ni sandiroktna gita MDA sorkarini kosako sakkirangko chimongengaha ineba BJP-ni dilgiparang parakatahachim.