Block-I-ni ning·o donggipa manderangko Assam Police dokkol ka·enga ine KSU matnanga

SHILLONG: West Jaintia Hills a·jani Block-I-ni ning·o donggipa dingtang dingtang songni manderangko Assam-ni police-rang aro Karbi jatni manderang dokkol ka·na jotton ka·enga ine Khasi Students Union (KSU) parakatenba, ia jolrango songdongenggipa manderangna chel·chakaniko on·china a·dok sorkariko didiataha.

Block-I-ni ning·o donggipa Pnar manderangko dokkol ka·e rojachina Karbi manderangko didiatengon, mikkangchiba iandake ia jolrango songdongenggipa Pnar manderangko kal·ake roangkugenchimode nanga gita ja·kurangko de·angskagen ine KSU mikrakataniko on·angaha.

“Ia jolrango songdongenggipa Pnar manderangko Karbi manderang sinjete rona jotton ka·rongenga, uni gimin ia jolrango songdongenggipa Pnar jatni manderangko iandake sinjete rojachina chinga Karbi manderangko mikrakatenga. Ia mol·molaniko knachakjagenchimode KSU-ba, Meghalaya a·dok ning·o songdongenggipa Karbi manderangko apsan daken dokkol ka·skagen,” ine KSU West Jaintia Hills District-ni president Laitphar Syngkrem, mikrakataniko on·angaha.

Syngkrem-ni parakatani gitade, adita salrangna skang KSU-ni tom·aniko Barato-o ong·atanio Block-I-ni manderangba tom·aniona re·baon, ia tom·anio bakko ra·eahani gimin Karbi manderang, songni nokma saksako rim·gittangna ka·mikkenatahachim aro untalan ia jolrango songdongenggipa Pnar manderang kenchipchipe dongtokengachim.

Ia jolrango songdongenggipa Pnar manderang, niam gri dingtang dingtang kajinarangko Assam-ni police-rangna gamna nangenga ineba KSU-ni dilgiparang parakataha.

KSU-ni parakatani gitade, Block-I-ni ning·o donggipa Pnar manderang, nok rikna am·pang ratgenchimoba, gama ge·anirangko dakgenchimoba aro bazar antirangona re·anggenchimoba Assam-ni police-rangna kajinarangko gamna nangrongengachim.

Karbi manderang, an·tangtangna dingtang a·dokko dabiengani gimin Block-I-ni ning·o donggipa dam 36 songrangkoba an·tangtang ra·gopna miksongesa ia jolrango songdongenggipa manderangko dokkol ka·enga ineba KSU WJH-ni president parakataha.

“Uni gimin ia jolrango songdongenggipa Pnar manderangni neng·nikanirangko niatchina aro chel·chakanirangko on·china chinga a·dok sorkariko didienga,” ine ua aganaha.