Adokgre-Mangsang ramako tariani kamrang ka·sinenga ine jolni manderang matnanga

Mangsang songo jinma tom·bimonganiko ong·ata

TURA: Adokgre-oni Mangsang-ona dakanggipa ramako tarianirang ka·sindugaenga ine matnangenba Budbar salo, dingtang dingtang NGO-rang, jolo songdongenggipa manderang baksa Mangsang songo jinma tom·bimonganiko ong·atangaha aro iani bidingo talataniko on·china a·dok sorkari aro PWD department-o dabiangaha.
Koborko on·ani gitade, ia ramako tarina gita 2017 bilsio gitcham Congress sorkari, gong kror 210 tangkarangko chamahachim indiba ramako tarina a·bachengaton NPP-chi dilenggipa gital MDA sorkari, ia ramako tarina chamgimin tangka paisarangko komiatahani ja·man kamrangko dontongpilatahachim.
Ia kilometre 43 ong·gipa ramako tarina da·o gong kror 123 tangkarangkosa chamaiahani a·sel kilometre 24 ramarangkosan matchotna man·aignok ine jolni dingtang dingtang NGO-rang, suk ong·gijaniko paraktokaha.
Kobor on·timgiparangni u·iatani gitade, da·o ia ramako tariani kamrang chu·gimik dontongattaiako man·aha indiba ia bilsini gisepon kamrangko a·bachengtaipilgen ine East Garo Hills a·jani PWD official-rang ku·rachakaniko on·aha.
Indake ong·engon, ia ramako tariani kamrang ka·sindugaengani gimin Budbar salo, Joint Action Committee (JAC)-ni dilanichi dingtangmancha jinma tom·bimonganiko ong·atangaha aro ia tom·anio GSU, FKJGP aro uandakgipa dingtang dingtang dolrang baksana jolo songdongenggipa manderangba bakko ra·angtokaha.
“Adokgre gita Rongjeng-oni Mangsang-ona dakanggipa ramako tariani kamrang ka·sinengani gimin da·alo chinga jinma tom·bimonganiko ong·atangaha. Ia ramako tarina gita 2017 bilsion gitcham sorkari nanga gita tangka paisarangko chamatahachim indiba gital sorkari jako ra·a intalan kamrang ka·sinangaha. Ia ramako tariani kamrang maini gimin ka·sinenga uko chinga ma·sina sikenga. Da·al salni bako chinga jinma tom·bimonge iani bidingo mikkangchi ja·ku de·angna gita jinma tik ka·e donangaha,” ine GSU Rongjeng unit-ni president Rattu Sangma parakataha.
NGO-rangni parakatani gitade, ia ramao bang·a dolongrangan namsrangjaengaha aro da·o ia ramako tariani kamrangba ka·sinengani a·sel ramako re·ruraenggipa manderang neng·nikanirangko chagrongna nangtokengahachim.

Get real time updates directly on your device, subscribe now.

Comments are closed.