SHILLONG: Ri Bhoi a·jao donggipa MeECL-ni Umsning Division-ko private company-rangchi chalaina sorkarini tik ka·aniko Ri Bhoi a·jani dingtang dingtang dolrang, jekai Khasi Students Union (KSU), Hynniewtrep National Youth Front (HNYF), Federation of Khasi, Jaiñtia & Garo People (FKJGP) aro Synjuk Ki Rangbah Shnong-ni nangrime bikotskagipa Joint Action Committee (JAC) raken jegalataha.
Iani bidingo JAC-ni dilgiparang, Sombar salo a·dokni Deputy Chief Minister aro Power Minister Prestone Tynsong-ko grongenba, Umsning division-ko private company-rangna chalaina on·jachina didiangaha.
A·dokni Power Minister-ko grongeani ja·mano JAC-ni secretary Ferdynald Kharkamni-ni parakatani gitade, sorkarini kamrangko private company-rangchi chalaianio olgrokanirangko nikna man·engani gimin MeECL Umsning Division-ko private company-rangchi chalaina sorkarini tik ka·aniko jolni manderang raken jegaltokenga.
“Meghalaya a·doko gitcham sorkari aro da·o chalaienggipa sorkariba, sorkarini department-rangko aro mongsongbate MeECL-ko private company-rangchi chalaina on·enga indiba ian a·doko songdongenggipa manderangna sorkarini dangdike on·na man·gijaniko mesokanisa ong·enga. Mawsynram, Mawkyrwat aro Garo Hills-ni badiaba badiaba biaprangoba sorkari, MeECL-ko chalaina gita FEDCO company-na on·ahani a·selan jolo songdongenggipa manderang aro kam ka·enggipa manderang neng·nikanirangko chagrongna nangtokenga,” ine Kharkamni parakataha.
Umsning Division-ko private company-ni chalaina sorkarini tik ka·aniara Umsning jolo songdongenggipa manderangni kosako re·ani gita ong·enga ineba JAC-ni secretary parakataha.
“Ia jolrango songdongenggipa aro bijoli jakkalenggipa manderangna awareness program-ko ong·atchengchina chinga sorkariko aganaha aro Power Minister, chingni nangnikani gita dakna ku·rachakaniko on·ataha,” ineba Kharkamni parakataha.
Indake ong·engon, Ri Bhoi a·jao songdongenggipa manderangni nangnikani gride Umsning Division-ko private company-rangchi chalaina on·jawa ineba JAC parakataha.