TURA: Meghalaya a·dokni SSA skulrango skigiparangna, re·anggipa June jaonin jagittamni dormaharangko a·dok sorkari on·kujaengani a·sel skigiparang neng·nikanirangko chagrongna nangtokengaha ine All Garo Hills SSA School Teachers Association (AGHSSASTA) parakataha.
AGHSSASTA-ni parakatani gitade, SSA skulrango skigiparangna bangki dongkuenggipa dormaharangko, ma·mong sorkarioniko tangka paisarangko man·soahaon chu·gimik matchote on·gnok ine a·dokni Deputy Chief Minister Prestone Tynsong, ku·rachakaniko on·ahachim indiba da·alonan skigiparang, jagittamni dormaharangko man·tokkujaengachim.
“Chinga iandake MDA sorkarini tol·e ku·rachakaniko chake dongchana man·jawaha. Da·onan ma·mong sorkari SSA skigiparangna tangka paisarangko watatkujaengama ma MDA sorkarisa, dingtang miksonganio skigiparangni dormahako ra·chipe dongengama?” ine AGHSSASTA-ni dilgiparang sing·doatenba, MDA sorkarini somoio SSA skigiparangna dormaha on·aniba tik ong·ja aro dormaharangkoba bariata dongjae skigiparangni neng·nikanirang batroroengaha ine parakataha.
Batanggimin adita jani giseposan a·dok sorkari, gong kror 272 tangkarangko ma·mong sorkarioniko man·soahachim ine janapatengon, SSA skulrango skigiparangna bangki dongkuenggipa jagittamni dormaharangko da·o salsa salgnini gisepo on·jagenchimode skigiparang, sorkarini kosako jingjengatanirangko dakna draatako man·taigen ine AGHSSASTA-ni dilgiparang mikrakataniko on·angaha.