TURA: 2005 bilsini September 30 tariko a·sel ong·ani Sukrobar salo bilsi 17 gapahaon, ia salo sianggipa sak 9 manderangko gisik ra·na gita dingtangmancha Tura aro Williamnagar-o tom·aniko ong·atangaha.
September-ni 30 tariko Police-rangni goanichi so·ota man·gipa sak 9 manderangko gisik ra·na gita Tura-ni District Auditorium aro Williamnagar-ni Rongrenggre-o tom·aniko ong·atangaha.
Bilsi 17-na skang, MBOSE-ni headquarter-ko a·dok sorkarini Shillong-ona ra·jitangna jotton ka·aniko manderangni jegaltokengmiting somoio Tura aro Williamnagar biap damgnion, jegalenggipa manderangko Police-rangni skatang goani a·sel Tura-o sak 4 aro Williamnagar-o sak 5 manderang so·otako man·ahachim. Ia a·sel ong·anio gimik sak 9 manderang so·otako man·angan baksana bang·bea manderang guli nangako man·e saknaanirangkoba man·tokahachim.
Ua apsan salon Baghmara-oba chatro chatrirang aro jolni manderang tom·aniko ong·atengachim indiba ua somoio rang·gitik mikkarang jimbee waahani a·sel manderang noktangtangona re·angpiltokna gita nangahachim aro uandaken Baghmara-o iandake a·sel ong·aniko chagrongna gita nangjahachim.
Indake ong·engon, Sukrobar attamo ia salko gisik ra·na gita dingtangmancha Tura-o tom·bimonganiko Garo Students Union (GSU) CEC-ni gita District Auditorium-o ong·atangaha aro ia tom·anio dingtang dingtang NGO-rang, chatro chatrirang aro ua salo sianggipa manderangni nokdangrangba dongpae bakko ra·angaha.
Ia tom·bimonganiko NESO-ni additional secretary general Manseng A Sangma dilangaha aro tom·ani a·bachengo ua Nokgipa Isolni bilko bi·e ra·chengaha.
Ia tom·bimonganiko aro ia salko gisik ra·e maniani bidingo GSU-CEC-ni president Tengsak G Momin, jinmana agan-talate on·angskaengon, mikkangchi A·chik a·song aro A·chik jat namroro silrorona man·na gita sakantikon on·kange kam ka·china didiangaha.
Ia salo sianggipa manderangko gisik ra·e mande ra·pilskaaniko on·na gita District Auditorium-o jinma tom·bimongani ja·man dingtangmancha Chandmary kal·chakramoba, ua biapo tarie donenggipa cenotaph-o jinma mombatirangko so·angaha.
2005 bilsini September 30 tariko ong·gipa a·selni bidingo minggni judicial inquiry-ko dakchina gita a·dok sorkari, kamoni neng·takgimin Justice DN Chaudhury-ko songe on·ahaon, Tura-o a·sel ong·anina District Administration aro Police dolko matnange report-ko on·ahachim.
Ua somoio Williamnagar-o a·sel ong·gipani bidingo gitcham Justice DN Baruah judicial inquiry-ko dakskaahachim indiba ua a·sel ong·anina darangkoba jaksi otgija, jingjengatenggipa manderangko namatna man·jae police-rang silchidarerangchi gona nangaha ine report-ko on·skaahachim.