JJM-ni kamo M’laya-ba nambatsranggipa a·dokrangoni damsa ine seokako man·a

SHILLONG: Songadam nokadamrango donggipa nokdangrangna chirangko sokate on·na ma·mong sorkarini ra·gatgipa Jal Jeevan Mission (JJM)-ni kamko chu·sokatanio Meghalaya a·dokba nambatsranggipa a·dokrangoni damsa ine seokako man·ahani gimin Robibar salo, Gandhi Jayanti-ko New Delhi-o maniangani somoio Meghalaya a·dokna a·songni President Draupadi Murmu-ni jakchi upattiko on·angaha.
Ia upattiko Meghalaya a·dok gimikni pal a·dokni PHE Minister Renikton Lyngdoh Tongkhar, President-ni jakoniko ra·chakeaha aro ia upattiko on·ani somoio India sorkarini Union Jal Shakti Minister Gajendra Singh Shekhawat-ba dongpae bak ra·angaha.
Official-rangni u·iatani gitade, JJM-ni kamko chu·sokatanio Meghalaya a·dok, States/UTs category-o gnigipa biapko man·aha aro ‘Har Ghar Jal’ (HGJ) status-o Meghalaya a·dokko Assam, J&K, Kerala, Manipur, Nagaland, Rajasthan, Sikkim, Tripura, Uttarakhand, Karnataka, Goa aro gipin a·dokrangna skang biapo donataha.
HGJ status-o Meghalaya a·dok, dam 597 songrango chu·sokgipa ong·aha aro dam 1500-mangni gita songrango chi pipe-rangko chate on·ani 100% gapaha ine official-rang u·iataha.
JJM-ni kamo chu·sokgipa ong·ahani gimin PHE department-ni official-rangko aro gipin kam ka·giparangko mittelpilatengon, 2019 bilsini August jao JJM-ko a·bachengatani somoio, songadam nokadamrango dam 4500-mangni gita nokdangrangsan chirangko soke man·engkuachim indiba da·alo dam lak 2.53-na baten nokdangrang, chirangko soke man·ahani gimin chang 55 baridapaha ine Meghalaya a·dokni Chief Minister Conrad Sangma parakataha.
“A·doko songdongenggipa manderangna chu·onga gita naljokgnigipa chirangko sokate on·anian ia sorkarini mongsonggipa daito ong·a aro chingni neng·nikaniko man·batsranggipa kamba ong·aha. Indake ong·genchimoba a·dokni diltubatsranggipa biaprangonan ringani chirangko sokate on·na rakbee kamrangko ka·ahani gimin anga dingtangmancha ia award-ko PHE department-ni official aro gipin kam ka·enggiparangna on·kangna ska,” ine Sangma parakataha.