SHILLONG: Assam aro Meghalaya a·dokni simarango meligrikna man·jaenggipa bangki biaprangkoba namatna gita Meghalaya a·dokchipakni regional committee-rangko songahaon, ia regional committee-rango sima jolrango donggipa dingtang dingtang songni Hima, Elaka aro uandakgipa songni nokni dilgiparangkoba donchina gita Khasi Students Union (KSU) aro Federation of Khasi Jaintia & Garo People (FKJGP) dolrang dabiangaha.
“Ia gnigipa bakni kamko ka·na gita songe dongimin dolgittam regional committee-rango Hima aro Elaka gita dakgipa songni nokni dilgiparangko donjahani gimin chinga kusi ong·ja maina chinga ia regional committee-rango songni nokni dilgiparangkoba bak ong·atpana nangnikengachim,” ine KSU-ni president Lambokstar Marngar parakataha.
Simarango songdongenggipa manderangni nangnikanirangkosa sorkari knachakna nangenga ineba ua aganaha.
Ia jolrango songdongenggipa manderangni nangnikanirangko sorkari ra·jagenchimode kakket bichalko jegalani gita ong·gen ine janapatengon, songni nokni dilgiparangkon galchange kamko ka·genchimode maming namgniko ra·bana man·jawa ine KSU-ni president parakataha.
“Uni gimin ia kamko ka·anio ADC aro Himarangkon mongsonggipa bak ong·atna nanggen. Ia kamko ka·anio a·dok sorkari, agre sikkelgija, sakantini nangnikanikon ra·china,” ine ua aganaha.
Skanggipa bako a·dok damgnini soi ka·grikgipa MoU-ko nipiltaina man·kugen ineba Marngar parakataha.
“Assam a·dok baksa MoU-o soi ka·grikaniara dilgiparangni nangnikani gitasan ong·aiengkua aro ia MoU-ko nipilna man·jawaha ine Chief Minister Conrad Sangma-ni agananiko anga an·tangde ong·nikja. A·dok damgnini sorkarirang nangrimgenchimode ia MoU-ko nipiltaina man·kugen. Uni gimin dingtang dingtang dolrangni dabienga gita ia MoU-ko nipiltaina a·dok sorkari cholrangko sandina nanga,” ine KSU-ni president parakataha.