SHILLONG: A·dok sorkarini program-rangko ong·atanio National People’s Party (NPP)-ni noksarangkosa mesoke, politics kal·na jotton ka·enga ine Hynnierwtrep Youth Council (HYC), a·dokni Chief Minister Conrad K Sangma aro NPP-ni gipin dilgiparangko matnangataha.
“A·dokni chief minister, saksa a·dok gimikni dilgipa ong·e aro a·doko songdongenggipa manderangna kamko ka·gipa ong·e sorkarini program-rango iandake doltangkosa niksengatna jotton ka·enganiara namen ra·chakna man·gijagipa kam ong·a aro iako sakantian jegalna nanga,” ine HYC-ni general secretary Roy Kupar Synrem parakataha.
HYC-ni parakatani gitade, re·anggipa September-ni 30 tariko, Nongstoin-Maweit ramana pangchakaniko songe on·na gita tom·aniko ong·atanio, a·dokni Chief Minister Conrad K Sangma baksana NPP-ni MLA-rang aro MDC-rangba dongpae bakko ra·angtokahachim aro ia program-o NPP-ni nisanrangko aro dilgiparangni asongchakgipa biaprangoba NPP-ni noksararakosa nikna man·aiahachim.
“Ia apsan biapkon pangchakaniko songna aro party meeting-naba jakkalaha indiba chingni sing·anide iandakgipa sorkarini program-o political dolsani nisanrangko songdoe mesokaniara kraani ong·ama?” ine Synrem sing·doataha.
“Ia project-rangna chamgipa tangkarangara manderangni tangkarangsa ong·a aro badiaba political dolni ong·ja. Ia tangkarangara badiaba political dolni tangkarangsa ong·genchimode chingo maming neng·nikani dongjawachim. Indiba iandake manderangni tangkachi ra·gatenggipa project ba kamna badiaba political dolni biming ba nisankosa mesokskaenga ong·ode uan niamni a·palo ong·enga,” ine HYC-ni general secretary parakataha.