SHILLONG: Jingjengatenggipa contractual skigiparangko Meghalaya Teacher Eligibility Test (MTET) sepiltaina cholko on·gen ine a·dok sorkarini ku·rachakaniko on·ahani gimin Sukrobar sal dipet Meghalaya Government Lower Primary School Contractual Teachers Association (MGLPSCTA)-ni jagimikna jingjengataniko dontongatpilaha.
MGLPSCTA-ni president Birbor Riangtem-ni parakatani gitade, sorkarini ku·rachakanio skigiparang chu·ongnikjagenchimoba, skigiparangni dabianiko sorkari knachakteljaengani gimin uamang jingjengataniko dontongna draatako man·skaaha.
Sukrobar salo MGLPSCTA-ni dilgiparang, a·dokni Education Minister Lahkmen Rymbui baksa gronggrike agangrikon, ra·gala man·gipa skigiparangko kamo ra·pilani kattade dongjawaha indiba bilsi batgimin skigiparangkoba MTET sepiltaina chol on·gen ine Education Minister ku·rachakaniko on·atahachim.
“Chinga sorkarini iandakgipa chol on·aniko ra·chaknade sikjachim indiba chingo maming gipin chol dongjae chingni jingjengataniko dontongatna draatako man·aha,” ine Riangtem parakataha.
