TURA: Simsanggre Village Court-na membor-rangko seokanio dam 36 a·kingni nokmarangko watchanggale aro maming agangrikchengani grisa seokaha ine ia dam 36 a·kingni Nokmarang, Garo Hills Autonomous District Council (GHADC)-ni chief executive membor (CEM)-na badi ka·e sedoataha.
Nokmarangni CEM-na badi ka·doangani gitade, Simsanggre Village Court-na seokako man·gipa membor-rangara pilakan Rongbing Boldak a·kingonisa ong·tokaiachim aro ia membor-rangko seokanio dam 36 a·king nokmarang baksade maming agangrikchenga dongjahachim.
“GHADC-ni u·iataniko on·ani gitade, bilsi 35-oni bilsi 60 ong·gipa manderangkosan membor-na seokna man·aiachim indiba Village Court-ni jury membor aro president-na seokako man·gipa mande sakgnian bilsi 60 batgiminsa ong·skaahachim,” ine Nokmarang parakataha.
Simsanggre Village Court-ni membor-rangko seokanio niamrangko ja·rikjaha ine matnangatengon, ia membor-rangko ra·galpilenba, dam 36 a·kingni Nokmarang baksa agangrikchenge gital membor-rangko seokna gita election-ko ong·atchina dam 36 a·kingni Nokmarang, GHADC-ni CEM-ko didiataha.
