SHILLONG: Meghalaya a·doko Casino gita dakgipa joa kal·chakram biaprangko sorkarini kulina manchianiko dingtang dingtang dolrang aro mongsongbate toromko dilgiparangba jegaltokengani gimin a·dok sorkari, iani bidingo chanchirimna gita ku·rachakaniko on·angaha.
Sombar salo, a·dokni Taxation Minister James PK Sangma-ni kobor ra·timgiparangna parakatani gitade, a·doko songdongenggipa manderang aro toromko dilenggipa manderangba casino kulianiko jegaltokengani gimin sorkari, iani bidingo chanchirimchengna tik ka·angaha.
Mondolini dilgiparangan iako jegalenga ong·ode sorkari uko knachakna nangao ga·aka ine Sangma parakataha.
“Angni chanchiani gitade, maiba kamko mondoli ba toromni dilgiparangan jegalenga ong·ode uko sorkari knachakna nanga. Uni gimin chinga iani bidingo chanchirimchengesa nangani kri ja·kurangko de·anggen,” ine Taxation Minister parakataha.
Meghalaya a·doko joa kal·aniko niamo ong·atna sorkarini manchianiko dingtang dingtang dolrang jegaltokengon, Meghalaya Regulation of Gaming Act 2021-ko a·dok sorkari den·galpilchina gita re·anggipa Sukrobar salosan, Khasi Jaintia Christian Leaders Forum (KJCLF)-ni membor-rang, jinma Nokgipao Isolo bi·e tom·aniko ong·atangskaahachim.
Ia tom·aniko KJCLF-ni dilgiparang, Shillong songjinmani KJP Assembly Chapel-o ong·atangaha aro ia tom·a matchotani ja·mano KJCLF-ni secretary Rev Edwin H Kharkongor, kobor ra·timgipa manderang baksa agangrikengon, Meghalaya Regulation of Gaming Act 2021-ko den·galpilchina didianio uamang sorkarini kosako jingjengatanirangko dakna nangnikjae, sorkarina Nokgipa Isolo bi·chakangskaaha ine parakataha.
“Chinga Kristianrang ong·e sorkarini kosako jingjengatanirangko ba jegalanirangko dakna nangnikjaenga indiba ia niamko den·galpilna man·na gita chinga a·dok sorkarina Nokgipa Isolo bi·chakna manchiskaaha,” ine ua aganahachim.
