SHILLONG: National People’s Party (NPP)-chi dilenggipa Meghalaya Democratic Alliance (MDA) sorkarini ka·sretgipa kamrangni bidingo je·ra ra·grikna gita Trinamool Congress (TMC)-ni national spokesperson Saket Gokhale-ni ra·bianiko a·dokni Chief Minister Conrad K Sangma aro Deputy Chief Minister Prestone Tynsong-ni jegalatani ja·man, NPP-ni sakgipin Cabinet Minister James PK Sangma-ba jegalataha.
TMC-ni jera ra·grikna ra·bienggipani gimin sing·anina aganchakaniko on·angengon, minister gimikan jera ra·grike dongaigenchimode sawa Secretariat-ona re·bae kamrangko ka·skagen ine Sombar salo, James sing·doataha.
A·dokni kamrangna simsakengani gimin Gokhale-ko mittelpilangengon, a·dokni Chief Minister aro Deputy Chief Minister sakgnian, nangan somoirango media-rangna aganchakanirangko on·engani gimin media-ni mikkango jera ra·grikna ra·bianiara nangchongmota ong·ja ine Sangma parakataha.
Meghalaya a·doko dingtang dingtang kamrangko ka·anio NPP-chi dilenggipa MDA sorkari kamrangko ka·sretenga ine matnangenba, TMC-ni national spokesperson Saket Gokhale, media-ni mikkango jera ra·grikna gita a·dokni Chief Minister Conrad Sangma aro Deputy Chief Minister Prestone Tynsong-ko ra·biatahachim ine nikna man·a.
Indake ong·engon, da·o dipet TMC, Meghalaya a·dokni election-rango changsaba susaa dongkuja aro adita sak MLA-rangko rime kataiani giminde Meghalaya a·dokni pal ku·rangko on·enga ine a·kangna man·jawa ineba James Sangma parakataha.
A·dokni manderang MDA sorkarini kamrango kusi ong·tokjaengaha ine Congress dolni matnangenggipa kattarangna aganchakaniko on·angskaengon, election sepangahaode iandake matnange agangipa kattarangde dongaia indiba glass-ni noko dongenggipa manderangde sakgipin nokrangko ro·ong gochengna nangja ine James parakataha.
