SHILLONG: Meghalaya Energy Corporation Limited (MeECL)-o contract-na kam ka·enggipa manderangni dabianirangko sorkari knachakjaengani gimin re·baenggipa October-ni 17 tariko Shillong songjinmani Main Secretariat-ona re·jomange sorkarini kosako jegalanirangko dakanggen ine MeECL Progressive Workers Union (MePWU) parakataha.
Iani bidingo kobor ra·timgiparangna talataniko on·angengon, MeECL-o contractual worker ong·e kamko ka·enggiparang, ru·uta somoirangna skangonin uamangni kamrangko regularise ka·china dabiengachim indiba uamangni dabianirangko sorkari knachakna gisik nangjaengani gimin re·baenggipa October-ni 17 tariko Main Secretariat-ona re·jomange jingjengatna manchiaha ine MePWU-ni president Mantiphrang Lyngdoh Kiri parakataha.
Kiri-ni parakatani gitade, contractual-o kam ka·enggipa manderangni kamko regularize ka·china aro uamangni man·na nangkuenggipa arrear-rangko on·china dabienba, Sombar saloba uamang 1:30 bajioni 2:00 bajiona MePDCL office mikkango asonge jingjengatangaha aro October-ni 14 tarikona kingkingan uamang apsan dake jingjengatangkugen.
“Chingni dabianirangko sorkari knachakna gisik nangjaengani gimin chinga ia ja·kuko de·na draatako man·aha aro chingni dabiani gita chingni kamrangko regularise ka·e on·jaskal aro chingni man·na nangenggipa arrear-rangko on·jaskal chinga sorkarini kosako jingjengatanirangko dakanggen,” ine MePWU-ni president parakataha.
