WILLIAMNAGAR: Meghalaya a·dokni gitcham chief minister Mukul Sangma aro gipin dilgiparangni ong·katani ja·man Meghalaya a·doko Congress dol bilgri ong·atako man·ahaoba, re·baenggipa bilsini election-o Congress dol tang·dobapiltaigen ine Indian National Congress (INC)-ni gitcham minister Deborah C Marak, an·tangni ka·dongchakenganiko parakataha.
“Mukul Sangma-ni watanganiara Congress dolko bilgriata gita ong·bebeaha indiba chinga Congress dol Meghalaya a·doko bilakbapilronggipa itihas donga. PA Sangma sagini Congress dolko watangani somoioba Congress dolni gimin bang·a manderangan sing·ani ong·katahachim indiba bilsigipinon DD Lapang-ni dilanichi chinga sorkariko rikna man·aha,” ine Marak parakataha.
Bilsi 139 ong·gipa Congress dol pangnan chakattaitaina man·gipa dol ong·a ineba Williamnagar constituency-ni gitcham MLA parakataha.
“Chingo onbatgipa gadangonin kamrangko ka·enggipa manderang bakrime dongkuenga aro unbaksana PCC, BCC, DCC, MPCC aro AICC-ba kamrangko ka·dilna gita pangnan tarie dongenga. Chinga Meghalaya a·dokni pilak dam 60 constituency-rangon candidate-ko susaatgen aro chinga Garo Hills-osan ong·aigija Khasi-Jaintia Hills gimikon name dakna ka·dongenga,” ine Marak aganaha.
NPP-chi dilenggipa MDA sorkariko matnangatengon, ia sorkariko tangka paisa jakkalsretanina agrede maming kamnan mingsingjaenga ine Deborah parakataha.
An·tangni Williamnagar constituency-o man·enggipa neng·nikanirangni gimin janapatengon, ia sorkarini ning·o lekka porani gita aro kamgri ong·e dongenggipa chadamberangna kamrangko tikate on·anio namen ja·manchakenga ine Marak parakataha.
AICC-ni presidential election-ko ong·atna sienggipani bidingo janapatskaengon, AICC-ni president-na susaenggipa Shashi Tharoor, re·baenggipa October-ni 15 tariko Shillong-ona re·baenga ine Marak parakataha.
AICC-ni president-na election-ko re·baenggipa October 17 tariko ong·atna siengachim.