SHILLONG: Adita salrangna skang, Secretariat-ona napdraange jingjengatenggipa skigiparangni kosako police-rangni tear gas godapgipani bidingo a·dok sorkari, district administration-ni report-o pangchake ja·kuko de·anggen ine Budbar salo, a·dokni Home Minister Lahkmen Rymbui parakataha.
“Re·anggipa Sukrobar salon chinga district administration-oniko iani bidingo report-ko bi·ataha. Da·o dipet iani report angona sokbaa dongkuja indiba report sokbaahaon nangani kri chinga ja·kuko de·gen,” ine Rymbui parakataha.
Home Minister-ni parakatani gitade, niamni kosako re·badegipa je dolni kosakoba sorkari nanga gita ja·kurangko de·anggen.
Obostarangko name ma·sichengna nanga ine janapatengon, uamang darangkoba jokatna ba maikoba dongnuna jotton ka·enga ong·ja ine Home Minister parakataha.
“Indiba ja·kurangko de·na skang niamko ja·rikchengna nanga,” ine ua aganaha.
Jingjengatenggipa skigiparangni kosako nangana bate bilko jakkalenba, tear gas-rangko godapahani gimin UDP dolko man·chape dingtang dingtang dolrang, Home department aro a·dok sorkarini kosakoi raken jegalattokahachim ine nikna man·a.
Iani bidingo Home Minister Lahkmen Rymbui-ko kam watchina gitaba dingtang dingtang dolrang dabitokahachim.