SHILLONG: Meghalaya a·doko specialist doctor-rangni chu·onggijaniko namatna gita a·dok sorkari jotton ka·enga ine Budbar salo a·dokni Health Minister James K Sangma parakataha.
Iani bidingo kobor ra·timgipa manderang baksa agangrikengon, specialist doctor-rang chu·ongjanichi a·doko sanna banani kamrang nangchakeaniko man·jana gita ja·kurangko de·na nangchongmotenga ine Sangma parakataha.
A·doko specialist doctor-rang chu·onggijaniko sorkari dongnuna jotton ka·jaenga ine talataniko on·angengon, 3F-ni ning·o rakkia man·gipa doctor-rangko rimbae manderangna dangdike on·skaani cholrangkoba sorkari sandienga ine Health Minister parakataha.
“Uni gimin iandakgipa olgrokanirangko chinga ku·rachakna jechakenga ong·ja indiba chu·onggijanirangko sandie ia kamrangko namdapatna gitasa chinga jotton ka·enga,” ine Sangma aganaha.
Meghalaya Public Service Commission (MPSC)-ni gita kam ka·giparangko rakkianio ja·manchakengani gimin sing·on, MPSC-ara jakgitelgipa bimangsa ong·aiani gimin ua iani gimin mamingkoba aganna sikja ine Health Minister parakataha.
“Angni chanchiani gitade, ia sing·anirangko uamango sing·on nambata aro aganchakanirangkoba uamangoniko ra·on nambata maina angade iani gimin aganna man·jawa. Indiba chinga man·a dipet MPSC baksaba agangrikna jotton ka·enga,” ine Sangma aganaha.
Bond segimin doctor-rang a·dokona re·bapile dangdike on·china gita sorkari cholrangko sandina jotton ka·enga ineba Health Minister parakataha.