SHILLONG: Congress doloniko ra·gala man·gipa sakbonga MLA-rang, re·baenggipa 2023 bilsini Assembly election-na skang, gipin political dolrangoni susaskana manchitokengahani gimin ia sakbonga MLA-rangna Congress dol, do·gako chipaha gita ong·skaengaha.
Sombar salo Meghalaya Pradesh Congress Committee (MPCC)-ni president Vincent Pala-ni parakatani gitade, BJP dolni bakrimenggipa MDA-na chakpaaniko on·ahani gimin ra·galako man·gipa sakbonga MLA-rangni dambonga constituency-rangon gipin candidate-rangko sandimanaha.
Re·anggipa bilsio Congress dolni sak 13 MLA-rang, Congress doloni ong·kate Trinamool Congress (TMC)-o napangani ja·man, a·doko bangki dongkuenggipa sakbonga MLA-rang, chong·motan Mohendro Rapsang, Ampareen Lyngdoh, PT Sawkmie, Mayralborn Syiem aro Kimfa Marbaniang, MDA sorkarina chakpaaniko on·skaahani gimin ia sakbonga MLA-rangko Congress dolo membor ong·aniko dontongatchengahachim.
“Congress dolko watanggipa dilgiparang pilakan kamni gimin ma·sigimin politician-rangan ong·a aro uamang MDA-na chakpaani biteko ma·sitoka. Da·o chinga uamangko re·bapilchina okamatna nangani katta dongjaha maina chinga uamangni biapo gipin candidate-rangko sandimanaha aro chinga ia seat-rangoni mitamkode chena sienga,” ine Pala aganaha.
Ia sakbonga MLA-rangko chu·gimik ra·galsranggenma ine sing·on, dilgiparangko ra·galna gita Congress dolo niamrang donga ine Pala parakataha.
Congress dolni gitcham dilgipa Mukul Sangma, Congress-ona re·bapilna gita aganatarang dongama ine sing·on, da·o dipet ua Congress dolona re·bapilna sienga ine AICC-oni maming u·iatako man·soa dongkujani gimin ian jangbingbanganisan ong·aia ine MPCC-ni president parakataha.