SHILLONG: Mijal Mongolbar salo, West Khasi Hills a·jani Nongstoin-o Farmers Collectivisation for Upscaling Production & Marketing System (FOCUS) aro Rural Backyard Piggery & Poultry Scheme (PROGRESS) program-rangko ong·atangenba, dingtang dingtang dolrangna tangka paisarangko aro jilla kaanirangko suale on·angaha.
FOCUS program-ni ning·o Nongstoin jolo donggipa dol 1957 producer group-rangna gimik gong lak 62.85-ni cheque-rangko suale on·angaha aro FOCUS+ program-ni ning·oba producer group-rango membor ong·enggipa dingtang dingtang nokdangni manderangna gong 5000/- ka·e tangkarangko chipe on·angaha.
Ia salni bako self help group-rangko dakchakna gita Community Investment Fund-ni gong kror 1.14 tangkarangko dol 44 village organisation (VO)-rangna suale on·angaha.
Ia apsan salon, YESS Meghalaya program-ni ning·o dol 18 chadambe dolrangna gong lak 7.40-ni cheque-rangkoba suale on·angaha.
Indake ong·engon, PROGRESS program-ni ning·oba jolo jile kae cha·enggipa manderangna wak bi·sarangko aro kuroiler do·orangko suale on·angaha.
Ia program-ko ong·atanio a·dokni Chief Minister Conrad K Sangma, mongsonggipa sokgipa ong·e jinmana aganprakangengon, FOCUS aro FOCUS+ program-ni ning·o game ge·e cha·giparang bilsiprakon gong crore 500 tangkako man·gnok aro ia program minggnikon sorkari, game ge·e cha·enggipa manderangni namgnina jako ra·e ka·angkuna tik ka·aha ine parakataha.
“Game ge·e cha·enggipa manderang da·o bilsiprakon gong crore 500 tangkarangko man·gnok aro game ge·e cha·enggipa manderangna pangkamgipa janggi tangani cholko on·na gita sorkari, ia program minggnikon jako ra·angkuna miksongenga,” ine Sangma aganaha.
