TURA: United Democratic Party (UDP) North Tura Block-ni gitcham general secretary Witson Ch Momin baksana sak 35 membor-rang, re·anggipa Sombar salo, Trinamool Congress (TMC)-o napangaha.
UDP-ni membor-rangko rimchaksona gita dingtangmancha tom·aniko Tura-o donggipa TMC-ni office-o ong·atangaha aro ia tom·anio Chokpot-ni TMC MLA Lazarus M Sangma, TMC-ni state mahila president Selma D Shira aro dingtang dingtang dilgiparangko bakko ra·angaha.
Ia tom·anio TMC-ona re·bagipa UDP-ni membor-rangna TMC-ni MLA Lazarus Sangma, rimchaksoani kattarangko aganangengon, Garo Hills-o dingtanganiko ra·bana gita dingtang dingtang dolni membor-rangkoba TMC-ona re·bachina aro ku·cholsan nangrime kamko ka·china didiangaha.
Skigiparangni nanganirangko chu·sokate on·jaengani gimin MDA sorkariko matnange aganangengon, Meghalaya a·doko SSA skulrango skigiparangsan ong·aigija dingtang dingtang skulrango skigiparangba somoi gita dormaharangko man·tokjaenga aro dingtang dingtang nanganirangna sorkarini kosako jingjengatanirangko daktokenga ine Sangma parakataha.
Election-na skang ku·rachakanirangko NPP-chi dilenggipa MDA sorkari da·onan chu·sokate on·kujaenga ine matnangatengon, batanggimin bilsibri atana Garo Hills-ni manderang neng·nikanirangko chagrongna nangtokahani gimin da·o dingtanganiko ra·bana somoi ong·aha ine Sangma parakataha.