SHILLONG: 1998 bilsio jekai United Democratic Party (UDP) dol, Jaintia Hills-ni damsni seat-rangko chegope itihasko tariahachim, apsan daken re·baenggipa 2023 bilsio National People’s Party (NPP) dolba, East aro West Jaintia Hills a·ja damgnini pilak seat-rangkon chegopgen ine Mongolbar salo, Jowai-ni NPP MLA Wailadmiki Shylla parakataha.
2023 bilsini Assembly election-o susagrikanide NPP aro UDP dolgnini giseposan ong·aigen ineba Shylla parakataha.
Shylla-ni aganani gitade, ua manderang baksa meli nangrime donggipa ong·ani gimin re·baenggipa bilsioba gnigipa changna Jowai constituency-o chepiltaina ka·dongenga. NPP-ni gipin sakdok candidate-rangba apsan daken chegiparang ong·gen ine Shylla, an·tangni ka·dongchakenganiko parakataha.
“Ia changoba itihasko segattaigen indiba ia changode NPP-ni ong·skagen,” ine ua aganaha.
Term-sanode MLA pilak kamrangko chu·sokatna man·ja ine ma·sitokani gimin Jowai constituency-ni manderang, pangnan an·tangtangni dilgipana cholko on·taipilronga ineba Jowai-ni MLA parakataha.
Jowai-o bilsi 25-na MLA ong·anggipa Roytre C Laloo aro bilsi 10-na MLA ong·anggipa Ma Sing Mulieh-ni giminba ua toe janapataha.
Shylla-ni parakatani gitade, da·o dipet uni MLA ong·engmiting somoio ua manderangoni chel·e dongkujachim aro pangnan manderang baksa bakrimesa pilak kamrangkon chu·sokatengachim.
