TURA: Re·anggipa Budbar salo, West Garo Hills a·jani police-rang, mande saksako adita pekatgipa samrang baksa rim·aha.
Police-rangni u·iatani gitade, koborko man·soani ja·man West Garo Hills Anti Narcotics Task Force (ANTF)-ni sipairang, Budbar pringonin ia mandeko sandina a·bachengataha aro uandaken konta 12-ni ja·man Robagre songni bilsi 23 ong·gipa Sagar K Marak-ko ANTF-ni official-rang rim·na man·aha.
Ia mandeoniko ANTF aro police-rang, gram 5.58 ong·gipa ‘heroin’ samrang baksana, ge 46 plastic vial-rang, gong 200 tangka aro mobile phone ge·sako Sim card gnang man·aha ine kobor on·aha.
Iani bidingo police-rang, mokordomako segatenba, am·sandianirangko dakengkua ineba u·iataha.
