TURA: Re·anggipa October 17 tarikoni manianggipa Wildlife Week 2022-ko Sukrobar salo, Tura-ni Dakopgre-o donggipa SMELC Building-o dingtangmancha program-ko ong·ate matchotataha.
Ia program-ko East aro West Garo Hills Wild Life Division-ni Divisional Forest Officer, Hub News-ni dakchakanichi Integrated People for Tourism Conservation (IPTAC) baksa nangrime ong·atangaha aro ia Wildlife Week manianiko matchotatani salo, West Garo Hills a·jani Deputy Commissioner Swapnil Tembe, mongsonggipa sokgipa ong·e bakko ra·angaha.
Ia tom·anio West Garo Hills a·jani Deputy Commissioner, jinmana aganprakangengon, samtangtango ong·telaigiparang aro do·o-matrang baksana matburingrangko ripinganio mande sakantini dakna nanggni kamrangni gimin gisik ra·atpilaniko on·angaha.
Bijarangni gamchatgipa ong·ani gimin aganangengon, ian chonbegipa jontusan ong·aigenchimoba, uamang biterangko on·na gita pul pangsani bitchilrangko panggipino ra·anga aro uandaken mandenaba cha·anirangko on·enga ine Deputy Commissioner parakataha.
Sam bolrang aro matburingrang maikai cha·anirangna pangchakgrika uarangni giminba Tembe, ia tom·anio jinmana agan-talate on·angaha.
Joltango donggipa buring bolgrimrangko aro matburingrangko ripinge rakkiani bidingo saksa sakgipinrangna agane on·skachina gitaba ua ia tom·anio bak ra·gipa manderangko aro mongsongbate chadamberangko didiangaha.
Ia Wildlfe Week-ko maniani bidingo East aro West Garo Hills Wildlife Division-ni Division Forest Officer Rupankar K Marak, jinmana talate on·angskaengon, buringo donggipa do·o matrangko, matburingrangko aro samtangtango ong·telaigiparangko ripinge rakkiani bidingo manderangna mikrakataniko on·na bilsiantian ia Wildlife Week-ko manienga ine parakangaha.
Antigimikna manianggipa Wildlife Week-o dingtang dingtang susaanirangko skulo poraienggipa bi·sarangna ong·atangaha aro unbaksana dingtang dingtang biaprangoba awareness program-rangko ong·atangaha.
