SHILLONG: A·dokni chadamberangna kamrangko ka·e cha·na cholrangko on·jaenga ine matnangenba, Sukrobar salo Federation of Khasi Jaintia & Garo People (FKJGP) dolni gita sorkariko jegale re·jomaniko ong·atanio, re·jomenggipa manderangoni mitamrang, gari gorarangko re·angenggipa dosgri manderangko skatang doka sata dakaha aro uandaken ia re·jomanio adita so·sojengjeng ong·anirangko nikangna gita man·aha.
Ia re·jomaniko FKJGP dolni membor-rang, Shillong songjinmao Motphran-oni Fire Brigade-ona ong·atangahachim.
Re·jomako a·bachengata bakan Khyndailad (Police Bazar)-ona dakanggipa GS Road-o, re·jomenggipa manderangoni mitamrang, rama gita re·pakangenggipa dosgri manderangko skatang dokna satna a·bachengaha aro mitam gari gorarangkoba an·tangtangni ra·bitenggipa gol·dikrangchi nosto ka·angaha.
Iandake dosgri manderangko dokanio police-rang maming ja·kurangko de·jahani gimin aro re·jomaniko dakdilenggipa manderangba maming champenganirangko dakjahani gimin ong·gija dakgipa manderang, Dhanketi bibrao, bilongbate so·sojengjeng ong·atangaha.
Sorkariko jegale re·jomenggipa manderangni iandake skatang dosgri manderangko doka sata dakani a·sel bang·a manderangan saknaanirangko man·tokaha.
Ia a·sel ong·a bakan social media-rango, dosgri manderangko skatang dake doka satanirangko video-rango niksona man·aha indiba da·o dipet ia a·selni bidingo sorkarioni aro FKJGP-ko dilgiparangoniba maming kattarang dongkujaengachim.
Koborko on·ani gitade, songbad company-o kam ka·enggipa mande saksakoba ia a·sel ong·anio jachipchang ra·ani gimin, re·jomenggipa manderangonin kragija dake dokaha.
Motphran-oni Fire Brigade-ona dakanggipa ramao dokkan dakenggipa bang·a manderangan kenjagoke, dokkanrangko chipe kattokaha ineba kobor on·aha.
Meghalaya a·doko chadamberangna kam ka·e cha·ani cholrangko on·jaengani a·sel, chadamberang ong·gija kamrangko ka·e cha·na draatako man·engani gimin sorkarini kosako jegalaniko mesokna gita FKJGP dolni gita jinma re·jomaniko ong·atangahachim ine nikna man·a.
Ia re·jomani aro jinma tom·bimonganiko ong·atani bidingo talataniko on·angengon, Meghalaya a·doko bang·bea chadamberangan kamgri ong·e dongna nangtokengoba, chadamberangni neng·nikanirangko namatna gita sorkari maming ja·kurangko de·jaenga ine nikahani gimin FKJGP, sorkarini kamna suk ong·gijaniko mesokna gita ia jinma tom·bimonganiko aro re·jomaniko ong·atenga ine FKJGP GHZ-ni president Pritam Marak parakatahachim.
