AMPATI: Education department-oniko maming dakchakanirangko man·jahani gimin South West Garo Hills a·jani Jewilgre songo nosto ong·e dongenggipa skul nokko songni manderang, Rerapara C&RD Block office baksa nangrime, MGNREGS-chi taripilaha ine kobor on·aha.
Koborko on·ani gitade, ia Jewilgre songni skul, bilsi snina skangan mikka balwa ta·rakanganio nosto ka·ako man·angahachim aro ia skul nokko taripile on·china gita songni manderangba baditaba changed education department-na sedoatahachim.
“Education department-na sedoatan baksana chinga officer-rangkoba gronge ia skulko tarina gita dakchakanirangko bi·ahachim. Baditaba chang mol·molatani ja·manoba tangka paisa donggijako pa·sike education official-rang, ia skul nokko taripile on·chipjaha,” ine songni mande saksa kobor ra·timgiparangna aganaha.
Kobor on·timgiparangni parakatani gitade, baditaba bilsirangna skang, mikka balwa ta·rakanganio ia skul nokni nokkingko man·angaha aro skul nokni do·ga, kelki aro pakmarangba nosto ong·atako man·ahachim.
“Skul nokni obosta namjae, wachini somoirangode skulrangko ka·na man·rongjae, bi·sarang class-rangko man·tokjaha aro ian bi·sarangni skie ra·ani baksana skigiparangni kamrangkoba champenga gita ong·aha,” ine songni manderang aganaha.
Ia skulo sak 70-na baten poraienggipa bi·sarang aro skigipa sakgni dongachim ineba kobor on·timgiparang parakataha.
Ia skul nokko rikna gita maming cholrangko man·jae ja·mano songni manderang, Rerapara block-ni gitcham BDO RZD Shira aro South West Garo Hills a·jani Deputy Commissioner Ramkumar S baksa agangrikeon, ia skul nokko MGNREGS-ni ning·o rikna tik ka·enba, ia skulko rikna gong lak 8 tangkarangko chame donataha ine songni manderang aganaha.
Uandaken songni manderang an·tangtangan ia skul nokko rike jasani gisepon matchotataha ine kobor on·aha.
Ia skul nokko songni manderang, Rerapara C&RD Block-ni dakchakanichi 2019 bilsini February jao rikna a·bachengaha aro uandaken March jaon ia skul nokko mathotataha.