SHILLONG: Mawkynrew-o songdongenggipa manderangni gimin a·dokni Deputy Chief Minister aro National People’s Party (NPP)-ni national vice president Prestone Tynsong-ni agangipa kattarangko Meghalaya Trinamool Congress (TMC) North Shillong Block-ni president Elgiva Gwyneth Rynjah jegalataha.
Mawkynrew-o songdongenggipa manderangko nitobate nikchina gita NPP, powder aro lipstick-rangko chu·onga gita on·gen ine Tynsong-ni agangipa kattarangko jegalatengon, ua nitobegipa Meghalaya a·dokni saksa deputy chief minister ong·e iandakgipa kattarangko agananiara an·tangko namen onatbee mesokaha aro ian uni manderangna aganna changgijako mesokaniba ong·aha ine Elgiva parakataha.
Sorkariko bilsi bongana chalaianio manderangko dilsretaha ine NPP-chi dilenggipa MDA sorkariko matnangatengon, indita bilsirangna NPP-chi dilenggipa MDA sorkari, manderangna maming kamrangkon ka·jaha ine TMC North Shillong Block-ni president parakataha.
“Meghalaya a·doko kamrangko ka·e cha·ani cholrang, manderangko sanchakani biaprang aro lekka porani cholrangko namdapatani bidingo Minister ba sorkariba maming miksonganian dongja ine an·ching nikna man·aha. Adita salrangna skangsan, jingjengatenggipa skigiparang baksa mai ong·aha an·ching pilakan ma·sia. A·doko indita kamrangko ka·sretengoba sorkari, manderangna lipstick aro powder-kosan on·na miksongenga,” ine Elgiva aganaha.
Tangka jakkalsretgipa ia sorkariko bon·atgen ine ku·rachakaniko on·angengon, “Meghalaya a·dokni manderang namen seng·bata aro ma·sibatani gimin ia sorkarina nambata aganchakaniko on·gen aro re·baenggipa election-o NPP-chi dilenggipa MDA sorkariko ra·gale galgen,” ine TMC North Shillong Block-ni president parakataha.