SHILLONG: India a·songni ning·o donggipa pilak skotong songjinmarangkon rel ramarangchi nangdimeatna gita ma·mong sorkari manchiengoba Meghalaya a·doko, aro mongsongbate Ri Bhoi, Khasi aro Jaintia Hills a·jarangode rel gari ra·napbaaniko dingtang dingtang dolrang jegalsotokskaengani gimin rel garirangko a·dokona ra·baani bidingo a·dok sorkari, jegalenggipa NGO-rangko man·chape pilak dolrang baksa chanchirimchenggen ine a·dokni Transport Minister Dasakhiatbha Lamare parakataha.
“Jegalenggipa dolrangko man·chape pilak dolrang baksa agangrikchenggijade chinga maming dakeba rel garirangko a·dokona ra·bakujawa,” ine Lamare aganaha.
Transport Minister-ni parakatani gitade, bakan ua dingtang dingtang dolrang baksa rel garirangko ra·baani bidingo chanchirime, rel garirangko ra·baanichi mai namgni aro mai namgijanirang donggen, uko nianggen ine adita salrangna skangsan a·dokni chief minister Conrad Sangma, una u·iatahachim.
Dingtang dingtang dolrang baksa tom·e chanchirimani ja·manosa rel garirangko ra·bagenma ba ia project-ko ra·galgen, uni giminde chanchianggen ineba Lamare parakataha.
Meghalaya a·doko rel ramarangko tarichina gita ma·mong sorkari, a·dok sorkariko didienga ine adita salrangna skangsan chief minister parakatahachim ine nikna man·a.
Meghalaya a·dokona niam gri napsrukanirangko champengsona gita ILP gita dakgipa niamrangko ra·gatchenggijade rel garirangko ra·napbana man·jawa ine a·dokni dingtang dingtang dolrang jegalsotokskaengachim.