TURA: Meghalaya a·doko Trinamool Congress (TMC)-ko bilakbatatna gita rakbee kamrangko ka·engon, Mongolbar salo North aro South Tura constituency-rango TMC-ni Mahila Block Committee-rangko songe donangaha.
Mahila Block Committee-rangko songna gita tom·aniko ong·atanio Meghalaya Pradesh Mahila Trinamool Congress Committee-ni president Selma D Shira, jinmana aganprakangengon, TMC dolo pilakni gita bilakrorobaenga aro Mahila Committee-ba TMC-ko bilakbatatna gita rake kamrangko ka·enga ine parakangaha. Dingtang dingtang kamrang donggenchimoba ia tom·bimonganiona re·bae bakko ra·eahani gimin ua dingtangmancha Tura jillani ma·giparangkoba mittelpilangaha.
Ia tom·anio Meghalaya TMC West Garo Hills-ni District Convenor Richard Mrong Marak-ba jinmana aganprakangengon, a·dokni pilak biaprangon chadamberang, me·aparang aro me·chikrangba TMC-na chakpaaniko on·enga ine parakangaha.
“A·dok gimikon TMC-na manderangni chakpaenganiko nike chinga namen aiao inmanbea. Dingtanganiko ra·bana man·gipade da·o TMC dolsan dongaiaha ine ma·siengani gimin me·chikrangba a·dok gimikon TMC-na chakpaaniko on·enga,” ine Marak parakataha.
NPP-chi dilenggipa MDA sorkari, a·dokni manderangko cha·bokaha ine matnangatengon, “Ia sorkari, chadamberangni kamgri ong·e dongengako nikoba maming dakchakanirangko on·na gisik nangjaenga aro batesa manderangna sinjetanirangko on·na jotton ka·enga. Batanggimin bilsibri atana CM Conrad Sangma-ni dilanio a·dokni me·chikrang aro chadamberang bang·a neng·nikanirangko chagrongna nangaha,” ine Marak parakataha.
Meghalaya a·dokni manderangko brena jotton ka·enga ine chief minister-ko matnange aganangengon, “A·doko chadamberang kamrangko ka·e cha·na man·na gita a·dokni gitcham chief minister Dr Mukul Sangma, dingtang dingtang program-rangko ra·gatahachim indiba da·o ong·enggipa chief minister-de election-na skang manderangkosa brena jotton ka·skaenga,” ine Meghalaya TMC-ni West Garo Hills District Convenor parakataha.