TURA: Tura Diocese-ni ning·o donggipa Garo Hills Catholic Union (GHCU)-ni bilsi 50 gapaniko November 4 tarikoni 6 tarikona Garobadha-o donggipa St Dominic Savio Church-o maniengon, ia manianiko Sukrobar salo, a·dokni Chief Minister Conrad K Sangma-ni jakchi a·bachengate on·angaha.
GHCU-ni bilsi 50 gapaniko manichakatanio Shillong-ni Archbishop Most Rev Victor Lyngdoh, Tura-ni Bishop Rt Rev Andrew Marak aro dingtang dingtang Catholic Mondolini dilgiparangba bak ra·angtokaha.
Ia manianiko a·bachengatani somoio Shillong-ni Archbiship Rev Victor Lyngdoh, tom·dakgipa manderangna aganprakangengon, ia Garo Hills-ni Catholic bebera·giparangna namen gisik ra·beani somoi ong·enga ine aganangenba, Garo Hills Catholic Union (GHCU)-ni ning·o songsalni namgnina kamrangko ka·enggipa dingtang dingtang dolrangna an·tangni namgipa skaniko on·angjolaha.
Ia tom·anio a·dokni Chief Minister Conrad Sangma-ba jinmana aganprakangengon, Garo Hills-o a·gilsakni seng·aniko aro an·seng baljokaniko on·na gita kamrangko ka·enggipa dingtang dingtang Catholic mondolirangko aro Catholic Mission-ko mittelpilangaha.
India a·songo Catholic-rang aro mongsongbate Kristianrangni jelbra jelsuani namen komibata ine janapatengon, India a·songo Catholic Mondolirangni lekka porani gita on·gilanide namen mongsonggipa ong·skaenga aro iana a·song gimikon Catholic-rangko mitteltokenga ine Sangma parakataha.
GHCU-ni bilsi 50 gapaniko Robibar salona kingking ia apsan biapon maniangengachim.
