TURA: Tura Diocese-ni ning·o donggipa Garo Hills Catholic Union (GHCU)-ni bilsi 50 gapaniko re·anggipa November 4 tarikoni 6 tarikona Garobadha-o donggipa St Dominic Savio Parish kal·chakramo maniangaha.
Ia manianiko a·bachengatanio a·dokni Chief Minister Conrad K Sangma, mongsonggipa sokgipa ong·e GHCU-ni nisanko badale on·angaha aro ia tom·anio Shillong-ni Archbishop Most Rev Victor Lyngdoh, Tura-ni Bishop Rt Rev Andrew Marak aro dingtang dingtang Catholic Mondolini dilgiparangba bak ra·angtokaha.
Ia maniani gnigipa sal, chong·motan November-ni 5 tariko Meghalaya sorkarini Chief Whip aro Williamnagar-ni MLA Marcuise Marak, mongsonggipa sokgipa ong·e bak ra·angskaaha aro ia tom·anio Guwahati Province-o A·chikrangoni Salesian Provincial ong·gipa Rev Fr Januarius S Sangma-ba dongpae Catholic bebera·giparangni Isolo olakkianiko dilangaha.
Ia maniani bon·kamgipa sal, chong·motan November-ni 6 tariko Tura-ni MP Agatha K Sangma, mongsonggipa sokgipa ong·e bakko ra·angskaaha aro tom·anio Tura-ni Bishop Rt Rev Andrew R Marak-ba dongpae bi·aniko dilangskaaha.
GHCU-ni bilsi 50 gapaniko salgittamna manianio All India Catholic Union (AICU)-ni president Elias Vaz, AICU-ni vice president Anthony Chinnappan, AICU Meghalaya-ni state president Bedarius Shylla, Shillong Catholic Association-ni membor-rang aro dingtang dingtang dilgiparang aro officer-rangba re·bae bakko ra·angtokaha.
Indake ong·engon, ia manianiko tom·tome matchotatna aro chu·sokatna man·ahani gimin GHCU-ni dilgiparang, ia program-na on·gilatgipa dingtang dingtang manderang, dilgiparang aro sorkari official-rangko mittelpilataha.
