TURA: Meghalaya a·dokni gitcham chief minister aro opposition Trinamool Congress (TMC)-ni dilgipa Mukul Sangma, re·baenggipa 2023 bilsini Assembly election-o, an·tangni Songsak constituency-ona agreba West Garo Hills a·jani ning·o donggipa Tikrikilla constituency-oniba susaangnaba gnang.
Da·o dipet ua Tikrikilla constituency-oni susaani bidingo maming parakanirang dongkujaengoba, kam ka·soanirangko nigenchimode ua Tikrikilla constituency-oniba susanaba gnang ine niksamsona man·enga.
Da·o dipet Tikrikilla constituency-o All India Trinamool Congress (AITC)-ni sakgipin membor Jimison Sangma MLA ong·engpitichim. 2018 bilsini Assembly election-o Jimison, Congress dolni tikitchi susae seokako man·ahachim indiba 2021 bilsio Mukul Sangma aro gipin MLA-rang Congress dolko wate TMC-o napangani ja·man uaba TMC-o napangskaahachim. Koborko man·soani gitade, Tikrikilla-ni MLA Jimison Sangma, AITC-ko wate da·o National People’s Party (NPP)-o napangskaaha indiba da·o dipet iani bidingo ua an·tangde mamingkoba parakskakujaengachim.
Re·baenggipa 2023 bilsini Assembly election-o BJP, Congress, UDP, TMC aro gipin candidate-rangko man·chape komibeoba sakbonga candidate-rang, Tikrikilla constituency-oni susanaba gnang ine kobor on·aha.
Tikrikilla constituency-oba susagenma ine sing·anina aganchakaniko on·angengon, “Chinga TMC-o pilakan jong-adarang gita ong·e dongenga aro susana nanggenchimoba jinmani namnikani gitasa ong·gen. Da·o dipet chinga election-na kamrangko ka·soengaha indiba Tikrikilla-o susaani giminde name tik ka·kujaenga,” ine Mukul Sangma parakataha.