TURA: NPP-chi dilenggipa MDA sorkarini ra·gatgipa Farmers Collectivisation for Upscaling Production & Marketing System (FOCUS) program-ara, gitcham sorkarini ra·gatgipa Integrated Basin Development & Livelihood Promotion (IBDLP) program-ni bakan ong·achim indiba ia program-ko MDA sorkari, an·tangtangni ra·gatgipa program dake mesokna jotton ka·skaenga ine Bristibar salo, Opposition Trinamool Congress (TMC)-ni dilgipa Mukul Sangma parakataha.
Bristibar salo, TMC-ni Block Level Meeting-ko Selsella-o ong·atanio ia kattarangko Sangma parakataha.
“Angni sorkariko chalaiengmiting somoio a·dokni nokdang ge·antian komibeoba minggittam janggi tangani cholrang dongchina gita chinga IBDLP-ko a·bachengate on·aha. Da·o NPP-chi dilenggipa MDA sorkarini FOCUS scheme-ara Basin Development scheme-ni bakan ong·a indiba a·bachengode MDA sorkari, IBDLP scheme-ko bon·atna jotton ka·aha. Da·alona kingkingan MDA sorkario maming dingtanggipa scheme-rang dongkuja aro ia sorkarini a·bachengata ine a·kangenggipa pilak scheme-rangan IBDLP-ni baksa ong·aia,” ine Sangma parakataha.
An·tangni chief minister ong·engmiting somoio manderangna tangka paisani gita dakchakanirangko on·na a·bachengatgipa program-rangni gimin janapatengon, financial power scheme gita ua me·chikrangko tangka paisani gita mangrakgipa ong·atna dingtangmancha scheme-ko ra·gate me·chikrangni bank account-ona gong 5000/- ka·e chipe on·ahachim ine TMC-ni dilgipa parakataha.
“2018 bilsio ia MDA sorkariko rikani ja·man, chingni a·bachengatgipa scheme-rangko ra·e katpiltokaha. Ia scheme-ni tangka paisarang dongkuengachim indiba manderang maming namgnirangko man·jaha. Uni gimin re·baenggipa 2023 bilsio chinga sorkariko rikpiltaiahaon ia tangkarangko manderangna suale on·piltaina jotton ka·gen,” ine Sangma aganaha.
