EGH-o gital Rongjeng Civil Sub-Division-ko CM-ni jakchi do·ga oe on·anga

TURA: Ru·utbea bilsirangna Rongjeng jolo songdongenggipa manderangni dabienggipa Rongjeng Civil Sub-Division-ko Sukrobar salo, a·dokni Chief Minister do·ga oe on·angaha aro ia Sub-Division-ko do·ga oe on·angani somoio Assembly-ni Deputy Speaker Timothy D Shira, Rongjeng-ni MLA Jim Sangma, North Tura-ni MLA Thomas A Sangma, Dalu MLA Brening Sangma, Kharkutta MLA Rupert Momin, Bajengdoba MLA Pongseng Marak aro gipin dilgiparangba dongpae bak ra·angaha.
Ia gital Rongjeng sub-division-ni ning·o Rongjeng C&RD Block-koba man·chapgen aro ia sub-division-ni ning·o dam 180-mangni gita songrang donggen. 2017 bilsio Rongjeng-o Administrative Unit-ko songchengahachim aro ia Administrative Unit-ko a·dokni Governor-oni u·iatanichi gital Sub-Division songe on·angskaaha.
Rongjeng Civil Sub-Division-ko do·ga oani somoio Rongjeng-ni MLA Jim Sangma, jinmana aganprakangengon, ru·utbea bilsirangna jolo songdongenggipa manderangni nangnikaniko chu·sokate ia Rongjeng Civil Sub-Division-ko bikote on·ahani gimin a·dokni Chief Minister Conrad K Sangma-ko aro MDA sorkariko mittelpilangaha.
Rongjeng-ko Civil Sub-Division songchina ku·rang on·chenggipa mandeara Lok Sabha-ni gitcham Speaker Purno A Sangma sagian ong·achim ineba ua, Purno sagini nikjumanganiko be·en pil·ate on·ahani gimin Chief Minister-ko mittelpilaha.
Ia gital Sub-Division-ko do·ga oe on·angani ja·man, Rongjeng Civil Sub-Division-ni gital SDO Reuben Ch Momin-na pakwate on·angengon, ia gisik ra·beani salo jinma tom·chimongbagipa manderangko a·dokni Chief Minister mittelpilangskaaha.
Ia gital sub-division-ko Rongjeng jolo songdongenggipa manderangna pakwate on·angengon, “Indita bilsirangna jolo songdongenggipa manderangni nangnikaniko chu·sokate on·na kusi ong·bea,” ine Chief Minister aganaha.
“Angni pagipa Purno A Sangma sagiara Rongjeng jolni manderang baksa melibegipa ong·achim. A·doko dingtanganiko aro namroro silroroaniko ra·bana gita chingni sorkari niksamsoani gnang kamko ka·enga,” ine ua aganaha.