TURA: Malaysia a·songoni aro Vellore songjinmaoni re·bagipa dolsa doctor-rang, November 14 tarikoni a·bachenge November 16 tarikona, West Garo Hills a·jani Jengjal Sub-Divisional Hospital-o aro Tura jillaoba surgical aro health camp-rangko salgittamna ong·atenga. Jengjal Sub-Divisional Hospital-ko Adventist Mission Hospital Society chalaiengachim ine nikna man·a.
Health check up camp-ko Tura-ni SMELC building-o ia salgittamni gisepo attamni 1:00 bajioni attam 8:00 bajiona ong·atenga aro medical baksana surgical camp-ko Jengjal Sub-Divisional Hospital-o ong·atskaenga.
Health check up-ko Malaysia a·songo donggipa Penang-oni re·bagipa doctor-rang ka·enga aro iano manderang maming tangka paisa gamna nanggijan blood pressure, BMI aro uandakgiparangko porikka ra·e nina man·enga.
Malaysia a·songoni re·bagipa doctor-rang manderangna indin porikka ra·e nianirangko dakan baksana an·seng baljoke dongani giminba agan-ku·pattianirangko on·angenga.
Jengjal Sub-Division Hospital-o Vellore-oni re·bagipa doctor-rang, porikka ra·e nianirangko aro sanna bananirangko ia salgittamni gisepo on·angskaenga.
Je manderangan ia cholko ra·e an·tangtangko porikka ra·e nina aro sanna bananirangko ra·na sikengachim Dr Amith Marak-na 9366704814 nomborona aro Dr Sengatchi M Marak-na 9366241147 nomborona ka·e sing·sandiatna man·gen ine u·iataha.
