SHILLONG: An·tangni Chief Minister ong·engmiting somoio ra·gate on·gipa scheme-rangko NPP sorkari, a·kangna jotton ka·enga ine Opposition Trinamool Congress (TMC)-ni dilgipa aro a·dokni gitcham Chief Minister Mukul Sangma matnangrongenganina Crowborough Hotel-ko uni matchotatchipna man·jahani gimin Mukul Sangma-ko a·dokni Deputy Chief Minister Prestone Tynsong matnangatskaaha.
Mukul Sangma-ni MDA sorkariko matnange aganenggipa kattarangni bidingo sing·anina aganchakaniko on·angengon, 2017 bilsio ua an·tangba nokdang ge·antinan matchu aro gong 5000 ka·e tangkarangko sualahachim aro iako ua ma·sina nanga ine Deputy Chief Minister parakataha.
“Uni gimin chinga da·o FOCUS ba PRIME gita dakgipa scheme-rangko jako ra·e ka·engoba chinga namesa ka·enga aro ia scheme-ni namgnirangko man·enggipa manderangba pattianiko man·tokenga,” ine Tynsong aganaha.
Tynsong-ni parakatani gitade, Mukul Sangma an·tangan bilsichetna kingking chief minister ong·e kamko ka·angahachim indiba ua Crowborough hotel-kon matchotate on·chipna man·jahachim.
“Ia hotel-ko Conrad Sangma-ni dilanichisa matchotatna man·aha,” ine ua aganaha.
Jail Road-o donggipa Marriot Hotel-ko re·baenggipa jaon matchotgnok ineba Deputy Chief Minister parakataha.