TURA: Meghalaya a·doko dingtang dingtang scheme aro program-rangko ra·gate on·anichi a·dok sorkari, manderangni janggi tanganiko dingtangatna kam ka·enga ine Bristibar salo, a·dokni Chief Minister Conrad K Sangma parakataha.
Bristibar salo, FOCUS plus, PROGRESS, Yess Meghalaya aro self help group (SHG)-rangni program-ko South West Garo Hills a·jani Rangatari songo ong·atanio a·dokni Chief Minister, ia kattarangko aganaha.
“Chingni sorkari, game ge·e cha·enggipa manderangni namgnina chanchie FOCUS aro gipin scheme-rangko ra·gate on·aha aro ia scheme-rangchi chinga uamangna man·a dipet dakchakanirangko on·na jotton ka·enga,” ine Sangma aganaha.
Gitcham sorkarini somoiode game ge·e cha·enggipa manderangna iandakgipa program-rang dongjachim ine janapatengon, game ge·e cha·enggipa manderangni namgnina ra·gatgipa program-chi a·doko sak lak 4.5 manderang namgniko man·aha ine Chief Minister parakataha.
Salgro salaram jol gimiko FOCUS aro FOCUS plus program-rangan game ge·e cha·enggipa manderangni dal·batsranggipa program ong·a ine talataniko on·angengon, nokdang ge·antinan gong 5000-ko da·o mikkang bilsi 10-ni gisepo on·anian ia sorkarini miksongani ong·enga ine Chief Minister parakataha.
Ia FOCUS program-ni ning·o on·enggipa tangkarangara sud ba loan-na on·enggipa tangkarang ong·ja indiba game ge·e cha·enggipa manderangko dakchakna on·enggipa tangkarangsa ong·a ineba Chief Minister, talataniko on·angtaiaha.
Ia program-ko ong·atanio Rangatari jolo donggipa sak 793 producer-rang, FOCUS plus-ni gimik gong lak 7.93-ni cheque-rangko man·aha aro PROGRESS program-ni ning·o sak 400 wak jilgiparang aro sak 70 do·o jilgiparangba wak bi·sarangko aro kuroiler do·o bi·sarangko man·aha.
Sorkarini program-rangchi manderangni janggi tanganiko dingtangatna kam ka·enga: CM
Date:
Share post:
