SHILLONG: Bilsi bri skangan Shillong songjinmako Smart city project-ni 100-gipa aro bon·kamgipa bak ong·gen ine parakatachim, indiba da·onan Meghalaya-o ia project-ni gita maming mingsaba project-kon songa dongkujaenga.
Ia project-ni ning·o sorkari, songjinmani dingtang dingtang bakrango smart road ba ramako tarina aro dingtang dingtang junction ba rama bibrarangko namdapatna miksongenga, sorkari, adita salrang skangsan ia project-na tender-ko wataha.
Shillong Smart City Limited, ‘Smart roads’ ba ramako bak gni dake tarina km 15.9 ramako nie donaha. A·dok sorkari, adita salrang skangsan ‘Smart Roads Ph-II’ (km 10) aro dil 12 rama bibrako namdapatna tender-ko on·aha.
Batanggimin bilsi 2020-o Polo-o Commercial Complex-ko rikna gita contract-ko on·aha aro ua project-ko ia bilsini November jaon matchotatna tik ka·ahachim, indiba da·onan ua project-ko matchotna man·kujaenga.
Una agreba sorkari, Motphran aro sepangjolgipa jolrango Smart city project-ni gita parking lot-rangko rikna miksongenga, uaba da·onan dongkujaenga.
Polo-o commercial complex-ko rika baksana sorkari, Laitumkhrah-ni Municipal Market-ko namdapatna tik ka·e bilsi 2020-o contract-ko on·ahachim indiba ua project-ba bangbang ong·e dongenga.
Shillong Smart City Project (SSCP)-ni ning·o a·dokni skotong Shillong-o ming 34 project-rangko a·bachengatgen, ua project-ni chu·gimik korosara kror 1,040 ong·gen.
Ia Smart City Mission-ara Prime Minister Narendra Modi-ni bilsi 2014-o election-ko somoio on·na ku·chakgipa ong·a. Bilsi 2015 June jani 25 tariko ia scheme-ko a·songni dingtang dingtang dam 100 songjinmarangko develop ka·na ba namdapatna miksonganio parakataha.
