TURA: East Garo Hills a·jani Rongjeng police station-ni ning·o donggipa Chachat Gittim songoni bilsi 75 ong·gipa mande saksa, Umsning-ona re·angani ja·man gimaaha ine kobor on·aha.
Iani bidingo gimaenggipa mandeni depante, Patil N Sangma, Umsning police outpost-o missing report-ko ka·aha aro uni police-rangna u·iatani gitade, uni pagipa Pilbath G Momin, re·anggipa November 7 tarik attamni 6:30 bajimango Umsning SBI sambao gimaaha.
Uni gimaani somoio ia mande, shirt aro longpant tangsekko ganachim ineba kobor on·aha.
Gimaenggipa mandeara, Aisonsing Sangma minggipa mandeni depante ong·achim aro uni changroani 5’5 ong·a aro an·gil sakgisimachim.
Ia gimaenggipa mandeni gimin saoba kobor man·genchimode 9856810044 mobile nombor-ona ka·e u·iatchina gitaba ia mandeni depante mol·molataha.
