TURA: Ja·manchake koborko on·ani gitade, re·anggipa Bristibar walo, Garobadha outpost-ni ning·o donggipa Chatibhui bazar-ko wa·al kamaha aro wa·al kamanio dokkan damgittam kamchapako man·aha aro bi·sa sakgni saknaanirangko man·aha.
Kobor on·timgiparangni u·iatani gitade, dokkan damsao bijoli nosto ong·ani a·sel wa·al kamchakataha aro bazar-o donggipa galamal dokkan damgittamko kamchapaha.
Wa·al kamanio saknaa man·gipa bi·sa sakgniara, bilsi 13 ong·gipa Rohit Islam aro bilsi 15 ong·gipa Ariq Islam ong·a.
Wa·al kamani bidingo koborko man·soa bakan Garobadha-ni Fire & Emergency Service (F&ES) sipairang wa·al kamgipa biapona re·ange wa·alko kimiteaha.
Wa·al kamanio saknaa man·gipa bi·sarangkoba sanna gita hospital-ona ra·angaha.
