SHILLONG: Re·baenggipa 2023 bilsini Assembly election-o Khun Hynniewtrep National Awakening Movement (KHNAM) dol susajanaba gnang ine u·iataha.
KHNAM dolni president Pyndapborthiaw Saibon-ni kobor ra·timgiparangna parakatani gitade, ia chang election-o susana gita KHNAM dol maming tarisamsoanirangko dakjaenga.
“Da·o dipet darangba chingo party tikitna sing·egiparang dongkujani gimin re·baenggipa bilsini Assembly election-o chinga darangkoba susaatna miksonganirang dongjaenga,” ine Saibon parakataha.
KHNAM dolko uamang mikkangchina bilakbatatna gita kamrangko ka·soskagen ineba Saibon parakataha.
KHNAM dolni saksakamkam MLA aro North Shillong-ni MLA Adelbert Nongrum-ba ia chango Voice of the People’s Party (VPP)-o napskae susana miksongenganiko parakatahachim.
VPP-ni election manisfesto-o state reservation policy-koba man·chapna gita Nongrem-ni gitcham MLA Ardent Miller Basaiawmoit-ni dilanichi VPP ku·rachakahani gimin ua VPP-o napskae election-o susaan tik ka·aha ineba Nongrum parakataha.
Nongrum-ni aganani gitade, state reservation policy-ko nipilna nangengahani gimin VPP-ni election manifesto-o ia reservation policy-koba man·chapna tik ka·ahachim.
“Iako dakengon chinga Khasi aro Garo-rangni gisepo ma·sisretgrikaniko aro ding·chaogrikaniko ra·bana miksonganide dongja,” ine Nongrum aganaha.
KHNAM dolko 2002 bilsio gitcham MLA aro United Democratic Party (UDP)-ni da·o working president ong·enggipa Paul Lyngdoh bikotchengahachim.
