WJH-o a·sel ong·ani ja·man Cherry Blossom fest-ko man·chape pilak manianirangko dontongata

SHILLONG: Mongolbar pringo, West Jaintia Hills a·jani Mukroh songo, Assam police aro Assam forest guard-rangni goanichi Meghalaya a·dokni mande sakbongako man·chape gimik sakdok manderang siangna nangahani gimin a·dok sorkari, Shillong-o ong·atenggipa Cherry Blossom Festival-ko man·chape pilak manianirangko dontongatpilaha.

Ia a·sel ong·ani ja·man, a·dokni Chief Minister Conrad K Sangma, tanggitik tom·aniko ong·atangenba, ia a·sel ong·anio sianggipa manderangna an·tangni kalimpaaniko parakataha aro sianggipa manderangna kalimaniko mesokna gita a·doko ong·atenggipa pilak festival ba manianirangko dontongatpilna tik ka·angaha.

Shillong Cherry Blossom Festival-ko November 24 aro 25 tarikrango salgnina ong·atna gita program-rangko tarisoahachim aro ia festival-ona dingtang dingtang a·songrangoniba bakko ra·na gita re·batokengachim.

Indake ong·engon, West Jaintia Hills a·jani Mukroh songo a·sel ong·anichi so·sojengjeng ong·anirang batroroangjana gita Khasi, Jaintia aro Ri Bhoi a·jarangona konta 48-na internet-ko sorkari dontongatchengaha.

Home (Police) Department-oni u·iatani gitade, Whatsapp, Facebook, Twitter, Youtube aro uandakgipa social media-rang gita manderang, a·sel ong·ani noksarangko aro ma·manti ding·chaoatani kattarangko wate so·sojengjeng ong·atna man·jana gita West Jaintia Hills, East Jaintia Hills, East Khasi Hills, Ri Bhoi, Eastern West Khasi Hills, West Khasi Hills aro South West Khasi Hills a·jarango, Mongolbar pring 10:30 bajioni a·bachenge konta 48-na internet-ko dontongatchengaha.