SHILLONG: Re·anggipa Mongolbar pringo, West Jaintia Hills a·jani Mukroh songo Assam police aro forest guard-rangni skatang goanichi so·otako man·gipa mande sakbongani nokdangrangko Budbar salo, a·dokni Chief Minister Conrad Sangma baksana gipin cabinet minister-rang grongeaha aro ia nokdangrangna nokdang ge·prako gong lak 5 ka·e cheque-rangkoba on·angjolaha.
Mukroh songona Chief Minister baksa re·anggipa gipin cabinet minister-rangara, a·dokni Deputy Chief Minister Prestone Tynsong, PHE Minister Renikton Lyngdoh, Urban Affairs Minister Sniawbhalang Dhar aro Social Welfare Minister Kyrmen Shylla ong·a.
Kalimenggipa nokdangrangko gronge agangrikengon, Mukroh songni manderang baksa bakrimaniko mesokna gita a·dok sorkari, pilak sorkari program-rangko aro manianirangko dontongataha ine Chief Minister parakataha.
Uni Mukroh songona re·anganio a·dokni Chief Minister, jegalsoenggipa NGO-rangkoba grongjolbaaha aro a·sel ong·anichi sianggipa manderangna aro saknaa man·gipa manderangna kakket bichalko man·e on·na gita ku·rachakaniko on·angaha.
Ia a·sel ong·anio Mukroh jolni mande sakbonga aro Assam-ni forest guard saksa so·otako man·ahani gimin ia a·selni bidingo NIA ba CBI-chi inquiry-ko dakatchina gita Assam aro Meghalaya sorkari dolgnian, ma·mong sorkariko mol·molna tik ka·aha ineba Chief Minister, jolni NGO-rangna parakaha.
Ia a·sel ong·anio jak donggipa police officer-in-charge aro forest official-rangko man·chape pilak officer-rangkon kam dontongataha aro West Karbi Anglong-ni SP-koba gipin biapona kam ra·jitataha ineba ua, NGO-rangna parakataha.
November-ni 24 tariko Meghalaya Cabinet-ni dilgiparang, Delhi-ona re·ange Union Home Minister Amit Shah-ko grongenba iani bidingo agangrikgen aro uni ja·man Assam-ni Chief Minister Himanta Biswa Sarma baksa tom·e iani bidingo agangrikgen ineba Chief Minister parakataha.
Jegalsogipa dolrangoni Jaintia Students Union (JSU)-ni dilgiparangba ia salo, a·dokni Chief Minister-ko gronge, Mukroh-o police outpost-ko songchina gita memorandum-ko on·angskaaha.
Iani bidingo JSU-ni dilgiparangna talataniko on·angengon, adita salrangna skangsan a·dok sorkari, Barato-o police outpost-ko songa aro ia outpost-ko bakan chalaignok indiba jolo songdongenggipa manderangni nangnikani gita Mukroh-o outpost-ko kulina gita sorkari chanchianggen ine Chief Minister parakataha.
