RESUBELPARA: Re·anggipa Mongolbar salo, District Aquafest 2022-ko North Garo Hills a·jani Resubelpara-o donggipa Rangjokram pokkrio ong·atangaha aro ia Aquafest-ko ong·atanio, na·tok jile cha·enggipa manderang, dingtang dingtang rokomni na·tokrangko palna sim·na, dingtang dingtang department-ni official-rang baksa agangrikna cholrangko man·angaha.
Ia aquafest-ko ong·atanio, gital dake na·tok jilani bewalrangko dake mesokangan baksana dingtang dingtang department-ni exhibition-koba ong·atangaha.
Ia aquafest-ko North Garo Hills a·jani Fisheries department ong·atangaha aro ia program-ko ong·atanio North Garo Hills a·jan Additional Deputy Commissioner Ripamchi N Sangma, mongsonggipa sokgipa ong·e jinmana aganprakangengon, na·tok jilaniara mandena mingsa janggi tangani chol gita ong·e, ian cha·aniko on·na aro tangka man·ani cholkoba on·na man·a ine parakangaha.
North Garo Hills a·jao bang·a a·arangkon gama ge·anirangna jakkalkujani gimin na·tokrangko jilna gita namen nambegipa biap ong·a ine janapatengon, an·tangtangni galchipe donenggipa a·arangko Fisheries department-ni dakchake on·anichi na·tok jilchakani pokkrina kite jakkalchina ua, jolni manderangko aro mongsongbate na·tok jilenggipa manderangko didiangaha.
An·tangtangni man·gnirangko baridapatna gita gama ge·anirangko dake cha·an baksana na·tokrangko jile cha·china gitaba Sangma, a·jao game ge·e cha·enggipa manderangko didiangaha.
Ia program-ko ong·atani bidingo Fisheries-ni Superintendent in-charge CN Marak jinmana talate on·angskaengon, a·dokona gipin biaprangoniko na·tok ra·baaniko komiate a·doktangon chu·onga gita na·tokrangko man·na Mini Mission 3-ni ning·o joltangni na·tokrangko ripingna gita chiring chibisikrangko tange rakkina miksonge ong·atanian ong·enga ine parakataha.
