TURA: South Tura-ni gitcham MLA aro re·baenggipa 2023 bilsini Assembly election-o South Tura constituency-oni susana gita BJP-ni tikitna susaenggipa John Leslee K Sangma-ko BJP-ni national vice president aro Meghalaya-ni in-charge Dr M Chuba Ao-ko man·chape BJP-ni dilgiparangsa BJP-o napchina okamataha ine a·kangatani ja·man uni iandake a·kangenganiko name nipiltaina nangani ong·enga ine BJP Tura City District Committee-ni general secretary Wilver Greham Danggo parakatskaaha.
Danggo-ni parakatani gitade, Benedic Marak-ni GHADC-o CEM ong·engmiting somoioba Tura-ni MDC Bernard N Marak-ko executive committee-o biap on·na jechake, Akki Sangma-kosa CEM-ni adviser ong·china BJP-ni dilgipa Chuba Ao nangnikaha ine a·kangahani gimin da·o John Leslee Sangma-ko BJP-o napchina Ao-sa okamataha ine agananikoba name nipiltaina nangengachim.
“John Leslee Sangma-ko BJP-o nape, party-ko bilakbatatchina Dr Ao okamatengnaba gnang indiba darangba tikitko on·gen ine ku·rachakede darangkoba BJP-o napchina okamatna man·jawa,” ine Bristibar salo Danggo parakataha.
Budbar salosan, South Tura-ni gitcham MLA John Leslee Sangma, an·tangko South Tura-ni BJP candidate ine a·kanga dongja indiba tikitna susaanisan ong·aia ine talataniko on·angahachim ine nikna man·skaachim.
South Tura constituency-na BJP-ni tikitko on·anide high command aro election committee-ni jakosa ong·aia ineba Sangma talataniko on·angahachim.
Indake ong·engon, John Leslee Sangma-na mikkang nitee party tikitko on·genchimoba BJP-ni niamkon pe·ani gita ong·gnok maina party tikitna dorgastokode district committee-osa galchengna nanga aro ia niamko ma·mongni aro a·dokni dilgiparangba pe·na man·jawa ine BJP Tura city district committee-ni general secretary parakatskaaha.
Garo Hills-o BJP-ni mitam dilgiparang doltangni kosako re·e, ama man·atnasa miksonganirang donga ine janapatengon, John Leslee-ni MLA ong·engmiting somoirangoniko uni MLA scheme-rangni gimin RTI ka·e am·sandion, ‘me·mang project’-rangko bang·en nikna man·aha aro iani a·selsa ua 2018 bilsini Assembly election-oba amako man·aha ine Danggo matnangataha.
“Ua ma·mongni dilgiparang baksa agangrikchengani ja·mansa BJP-o napengnaba gnang indiba tikitna dorgastoko galna aro an·tangko candidate ine a·kangna gitade ua skanggipa district committee-onasa re·bachengna nanggen. Ia niamko ma·mong aro a·dokni gitaba ja·rikna nanga. Ua district committee-ona re·bae dorgasto galgenchimosa chinga uko nipilenba a·dokona watatgen,” ine Danggo parakataha.