SHILLONG: West Jaintia Hills a·jani Mukroh songo, Assam police aro forest guard-rangni goanichi Meghalaya a·dokni mande sakbongako man·chape gimik sakdok manderang siangna nangahani gimin ia a·selni bidingo ma·mong sorkari, Central Bureau of Investigation (CBI)-chi sandirokaniko dakna ku·rachakataha ine Bristibar attamo, a·dokni Chief Minister Conrad K Sangma parakataha.
Ia a·sel ong·ani bidingo Union Home Minister Amit Shah-ko gronge agangrikna gita Bristibar salo, a·dokni Chief Minister Conrad Sangma baksana gipin cabinet minister, New Delhi-ona re·angahachim ine nikna man·a.
Union Home Minister-ko grongani ja·man kobor ra·timgipa manderang baksa agangrikengon, Mukroh songo dosgri manderang so·otako man·na nangahani gimin uamang iani bidingo NIA ba CBI-chi sandirokatchina ma·mong sorkariko didiaha aro ia a·selko CBI-chi sandirokatna gita Union Home Minister Amit Shah ku·rachakataha ine Bristibar attamo, a·dokni Chief Minister Conrad K Sangma parakataha.
Sangma-ni parakatani gitade, ia a·selni bidingo Assam-ni Chief Minister Himanta Biswa Sarma-ba apsan salon, Union Home Minister-ko gronge, ia a·selko CBI-chi sandirokatchina mol·molbaahachim.
“Ia a·sel ong·aniara namen kragijagipa aro ong·nanggijagipa a·sel ong·ahani gimin chinga ia a·selko ma·mongni gita inquiry-ko dakatchina nangnike, ia salni bako Union Home Minister-ko grongeaha aro ua chingni nangnikani gita, ia a·selko CBI-chi sandirokatna ku·rachakataha,” ine Meghalaya Chief Minister parakataha.
Union Home Minister-ko grongeani somoio a·dokni Chief Minister baksana, Deputy Chief Minister Prestone Tynsong, Home Minister Lahkmen Rymbui aro gipin cabinet minister-rangba dongpaahachim.
WJH a·jao a·sel ong·aniko CBI-chi inquiry dakna ma·mong sorkari ku·rachaka
Date:
Share post:
