SHILLONG: Adita salrangna skang, West Jaintia Hills a·jani Mukroh songo dosgri manderangko goanio jak donggipa Assam police aro forest guard-rangko Meghalaya a·doko bichal ka·china KSU, FKJGP, HNYF, JSU aro RBYF dolrang dabiangaha.
“November 22 tarik pringo Mukroh songo Meghalaya a·dokni manderangko gogipa Assam police aro forest guard-rangko Assam sorkari, Meghalaya sorkarina pakwate on·na nanga. Dongimin niamrango pangchake dos dakgipa Assam police aro forest guard-rangko Meghalaya sorkari, nanga gita sasti on·na nangchongmota,” ine KSU-ni general secretary Donald V Thabah parakataha.
Assam aro Meghalaya a·dokni simarango songdongenggipa manderangko chel·chakna gita SF-10 aro Special Operation Team (SOT)-rangko donatjaengani giminba ua a·dok sorkariko sing·doangaha.
Simarango songdongenggipa manderangna naljokaniko on·aniara sorkarini daitoan ong·a ine janapatengon, ia jolrango manderangko chel·chakna gita dingtangmancha special border police unit-ko kulichina gita KSU-ni general secretary dabiangaha.
Mukroh songo nanga gita a·dokni sipai dolrangko donatgenchim ong·ode ia a·sel ong·jawachim ine FKJGP-ni president Dundee Cliff Khongsit parakatskaaha.
“Kenchakna nangenggipa pilak border point-ni km 1 ning·o police station aro police outpost-rangko donna nanga,” ine ua aganaha.
Assam baksa nangchapgipa pilak simarango songdongenggipa manderangna a·dok sorkari, nanga gita chel·chakanirangko on·na man·jagenchimode re·baenggipa 2023 bilsio ong·atna sienggipa Assembly election-ko ong·atna on·jawa ine JSU-ni dilgipa Treibor Raul Suchen parakatskaaha.