SHILLONG: Meghalaya Police-ni dingtang dingtang kamrangna porikkarangko ong·atanio da·onan result-rangko parakkujaengani gimin porikkako segipa candidate-rang, sorkarini kamo suk ong·gijaniko mesokna gita re·baenggipa November 30 tariko, Shillong songjinmao Malki Point-oni Shillong Civil Hospital sambao donggipa Kiang Nangbah-ni mangkrongko songgipaona tom·tome re·jomaniko ong·atna tik ka·aha.
Iani bidingo kobor ra·timgipa manderangna talataniko on·angengon, Meghalaya police-o bangbang ong·e dongenggipa ge 1000-na baten kamrangko gapatna interview-ko ra·ahachim indiba da·alonan ia interview-ni result-ko parakkujaengani gimin uamang, ia result-ko ta·raken parakchina dabie ua re·jomaniko ong·atenga ine candidate-rangoni saksa Bapura Rynghang parakataha.
Ia kamni result-ko parakchina dabie uamangni jingjengatani ian gittamgipa chang ong·gnok ineba ua aganaha.
“Ia kamni result-rangko ia bilsini gisepon parakchina chinga sorkario dabienga,” ine Rynghang parakataha.
Jingjengatenggipa candidate-rangni parakatani gitade, Meghalaya Police-ni kamrangna uamang 2019 bilsionin dorgastorangko galahachim aro Physical Efficiency Test-ko 2021 bilsini November jao ra·e, written test ba porikkako ia bilsini February jaon ra·ahaoba da·onan iani result-rangko parakkujaengachim.
Ia kamna porikkako segipa sak 3000-mangni gita candidate-rang, an·tangtangni result-rangna senge dongtokenga ine janapatengon, result-rangko ia bilsini gisepon je cholchiba parakna nanga ine candidate-rang dabiangaha.
Meghalaya police department-o bangbang ong·enggipa kamrangoni 70 percent-ko Garo candidate-rangna on·e, 20 percent-kosan Khasi-Jaintia candidate-rangna on·na miksongenga ine janapatengon, kamko Garo candidate-rangna 50% aro Khasi-Jaintia candidate-rangna 50% dake on·na nanga ine Rynghang dabiangaha.
