Khasi Hills-ni NGO-rang jingjengatangkuna ka·mikkenata

Assamese-rangni kosako ja·ku de·enga ong·ja ine talata

SHILLONG: Jaintia Hills a·jani Mukroh songo dosgri manderangko Assam police aro forest guard-rangni goe galani gimin ia sima jolrango songdongenggipa manderangna naljokanirangko NPP-chi dilenggipa MDA sorkari on·na man·ja ong·ode mikkangchiba uamang jingjengatanirangko dakangkugen aro uamangni mikkangchi ja·ku de·na sienggipani bidingo uamang mikkang antion jinmana parakatgen ine Sukrobar salo KSU, FKJGP, HNYF, RBYF aro JSU dolrang parakataha.

“A·dok damgnini simarango songdongenggipa manderangna chel·chakanirangko on·na man·na gita kenchakna nangbatenggipa biaprango police outpost-rangko songchina chinga dabienga aro ia dabianirangko ta·raken sorkari chu·sokate on·na nanga,” ine KSU-ni general secretary Donald V Thabah, kobor ra·timgiparangna parakataha.

Sima jolrango songdongenggipa Khasi manderangni kosako Assam sorkari, dokkol ka·na jotton ka·engani giminsa aro ia jolrango songdongenggipa manderangni neng·nikanirangko namatna gita Meghalaya sorkari gisiko nangjaengani giminsa uamang, Mongolbar salonin jingjengatanirangko dakenga ineba Thabah, talataniko on·angaha.

Ia jingjengatanirangko uamang Assamese ba badiaba jatrangko jegale dakenga ong·ja ineba KSU-ni dilgipa talataniko on·angaha.

Sima jolrango tom·tomaniko rakkina man·na gita special branch-ko kulichina a·dok sorkariko didiatengon, ia special branch-ko bikotgenchimode, Assam baksa nangchapegipa songni manderangna chel·chakanirangko on·na man·gen ine KSU parakataha.

“Uni gimin da·o chingni dabianiko aganchakanide sorkarini jakosa ong·enga. Mikkangchiba iandakgipa a·selrang ong·taijana gitasa chinga sorkario iarangko dabienga,” ine Thabah parakataha.

A·dokni Home Minister Lahkmen Rymbui-ko uamang kam watchina dabiani dongja ineba KSU-ni dilgiparang talataniko on·angaha.

“Home Minister kamtangko watgenchimode sawa uni biapko ra·skagen? Gital Home Minister jako ra·skagenchimoba iandakgipa neng·nikanirangko ua namatna man·genma?” ine Thabah sing·doataha.

Get real time updates directly on your device, subscribe now.

Comments are closed.