TURA: Adita salrangna skang, West Jaintia Hills a·jani Mukroh songo, Assam police aro forest guard-rangni skatang goanichi Meghalaya a·dokni mande sakbongako man·chape gimik sakdok manderang siangna gita nangahani gimin ia a·selni bidingo kakketko jinmana parakchina gita Garo Hills-ni dolbonga NGO-rang, chong·motan FKJGP, AYWO, ADE, FAF aro GSU dolrang, Meghalaya a·dokni Chief Minister aro Home Minister-ko didiataha.
FKJGP Garo Hills Zone (GHZ)-ni president Pritam Arengh-ni parakatani gitade, ia a·sel ong·ani somoio bol cha·ue badingenggipa manderangko Assam police-rang, Meghalaya a·dokona rikbaesa ja·mano ia gariko rim·e ra·angengmiting somoio songni manderang Assam-ni police aro forest guard-rangko chadrapaha aro iandake jinma chadrapahani giminsa police-rang, songni manderangko gochakna nangaha ine dingtang dingtang songbadrangko seengachim.
“Iandake songbadrango aro dingtang dingtang kobor on·timgiparangni parakaniara kakket ong·ja maina Shillong-oni chingni jong-ada NGO-skarangan ia a·sel ong·gipa biapona re·angkame kakket a·selko am·sandiaha aro uamangni ma·sina man·ani gitade, ua somoio songni manderang, an·tangtangni mi a·paloniko mi salbaenggipa Maruti 800 gari bolsako Assam police-rang maming niam gri rim·chengaha. Iandake dosgri manderangko rim·e dokkol ka·ako nikenba songni manderang, ia manderangko jokatna jotton ka·miting somoiosa Assam-ni police aro forest guard-rang, songni manderangko skatang gona a·bachengaha ineba chinga ma·sina man·aha,” ine FKJGP-GHZ-ni president parakataha.
Dosgri manderangko goani a·selko name talate on·china sorkariko didiatengon, pilakan kakketko ma·sichina gita sorkari, iani bidingo media-na talate on·na nangchongmota ine Marak dabiangaha.
Da·o dipetde, Mukroh songni manderang, niam gri bol badingenggipa manderangko warachakachim inesa media-rango parakenga ineba Marak parakataha.
Indake ong·engon, ia a·selko jegalna aro duko ga·akenggipa nokdangrangna kalimpaaniko mesokna gita Sukrobar salo konta gnina non-cooperation movement (NCM)-ko Garo Hills-oba ong·atanio bang·bata manderangan bakrimaniko on·ahani gimin ia dolbonga NGO-rang, Garo Hills-ni manderangko mittelpilataha.