AMPATI: Robibar attamchibara, South West Garo Hills a·jani Kendrakona songo, songni manderang chikol kitengmiting somoio rang·san a·koloni wa·al ong·katanichi manderangni gisiko aiao inmanbeaniko ong·ataha.
Ia obosta ong·ani ja·man bakan social media-rango manderang video-rangko watpriprana a·bachengaha indiba da·o dipet a·jani official-rang iani bidingo kakketko ma·sina man·kujaenga.
Jolo songdongenggipa manderangni u·iatani gitade, ua somoio a·a nokgipa, an·tangni mi a·palo jakkalna gita ia biapo chikolko kitengachim indiba chini pal ia a·koloni rang·san wa·alsa ong·katskaahachim.
Iani bidingo bakan songni manderang, Mahendraganj-o donggipa Fire & Emergency Service-na u·iataha aro ua biapona wa·al kimitgipa manderang re·bae wa·alko kimiteaha. Wa·alko kimitani ja·man, ia a·koloni ka·spu gita dakgipasa bokbake ong·katskaaha.
Manderangna maming kenchakani dongjana gita ja·mano ia biapko District Administration kapenge donatchengaha.
“Ia obostani bidingo name am·sandina gita South West Garo Hills a·jao u·i-ma·sigipa manderang dongjani gimin chinga a·dok sorkarina u·iatskaaha. Ia biapo torang dongachimma mai dongachim chinga name ma·sikujaenga aro u·i-ma·sigipa manderang sokbaani ja·mansa kakketkode ma·sina man·gen,” ine iani bidingo South West Garo Hills a·jani Deputy Commissioner G Kharmawphlang parakataha.
Koborko on·ani gitade skang somoirango, Oil & Natural Gas Corporation (ONGC)-ni gitaba ia apsan rama gitan torangko am·sandiangahachim indiba uamangni kamrangni gimin darangba ma·sichipkujachim.
“ONGC-ni watangani ja·man bang·a biaprangkon manderang a·kangtokaha aro haida ia biapba ONGC-ni dake nigipa biaprangoni damsa ong·engnaba gnang. Da·o dipet chinga kakketko aganna man·kujawa aro sorkarinasa sengna nangkugen,” ine South West Garo Hills a·jani official saksa parakataha.